ବାରିପଦା: ଦେଶର ବିଭିନ୍ନ ଗ୍ରାମାଞ୍ଚଳର ବିକାଶ ପାଇଁ ମହାତ୍ମାଗାନ୍ଧୀ ନିଶ୍ଚିତ କର୍ମ ନିଯୁକ୍ତି ଯୋଜନା(ମନରେଗା)ରେ ପଞ୍ଚାୟତସ୍ତରକୁ ଆସୁଛି କାମ । ହେଲେ ମୟୂରଭଞ୍ଜ ଜିଲ୍ଲା ମୋରଡା ବ୍ଲକ ବରକନ୍ଦ ଗ୍ରାମପଞ୍ଚାୟତରେ ଏହି ଯୋଜନାରେ ବାରିହେଉଛି ଦୁର୍ନିତିର ଗନ୍ଧ । ଆଦିବାସୀ ବହୁଳ ଏହି ଅଞ୍ଚଳରେ ଝିଙ୍କିରିଆ ପୋଲଠାରେ ଚେକ ଡ୍ୟାମ ନିର୍ମାଣ ପାଇଁ ହୋଇଥିଲା ଯୋଜନା । ଏନେଇ ବୋର୍ଡ ମଧ୍ୟ ଲଗାଗଲା । ହେଲେ କାମ ତ ଆରମ୍ଭ ହେଲା ନାହିଁ, ବରଂ ନିର୍ମାଣ ସମାପ୍ତି ନାଁରେ ବିଲ ଉଠି ସାରିଥିବାର ଆସିଛି ସଙ୍ଗୀନ ଅଭିଯୋଗ । ଏନେଇ ଗ୍ରାମବାସୀ ତାତିବା ସହ ଘଟଣାର ତଦନ୍ତ କରାଯାଇ ସମ୍ପୃକ୍ତ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଦାବି କରିଛନ୍ତି ।
ବରକନ୍ଦ ଗ୍ରାମପଞ୍ଚାୟତର ଝିଙ୍କିରିଆ ପୋଲଠାରେ ଚେକ ଡ୍ୟାମ ନିର୍ମାଣ ପାଇଁ ବୋର୍ଡ ଲାଗିଛି ହେଲେ ବୋର୍ଡରେ ନା ଅଛି କାର୍ଯ୍ୟ ଆରମ୍ଭ ତାରିଖ ନା କାର୍ଯ୍ୟ ଶେଷ ତାରିଖ । ସେପଟେ ଆରଟିଆଇ ତଥ୍ୟ ଅନୁଯାୟୀ ଏହି କାର୍ଯ୍ୟ ପାଇଁ 7 ଲକ୍ଷ ଟଙ୍କାର ବ୍ୟୟ ଅଟକଳ ରହିଥିବା ବେଳେ ଏହି କାର୍ଯ୍ୟ ଶେଷ ହୋଇ ସାରିଛି । ପଞ୍ଚାୟତ କାର୍ଯ୍ୟ ନିର୍ବାହୀ ଅଧିକାରୀ ଓ କନିଷ୍ଠ ଯନ୍ତ୍ରୀ ସମ୍ପୃକ୍ତ କାର୍ଯ୍ୟର ବିଲ ମଧ୍ୟ ଉଠାଇ ନେଇଛନ୍ତି । ତେବେ ଖାଲି ଏହି କାମ ନୁହେଁ ଏଭଳି ଏହି ପଞ୍ଚାୟତରେ ଅନେକ କାମ ନ ହୋଇ ବି ବିଲ ଉଠିଛି ବୋଲି ଅଭିଯୋଗ କରିଛନ୍ତି ଗ୍ରାମବାସୀ ।
ବରକନ୍ଦ ଗ୍ରାମପଞ୍ଚାୟତରେ ଚେକ ଡ୍ୟାମ, ଗ୍ରାମ୍ୟ ରାସ୍ତା ସହ ଏମିତି ଏହି ମହାତ୍ମାଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନାରେ ଅନେକ କାମ କେବଳ କାଗଜପତ୍ରରେ ହିଁ ହୋଇଛି ବୋଲି ଜଣାପଡିଛି। ତେବେ ଗ୍ରାମପଞ୍ଚାୟତର କନିଷ୍ଠ ଯନ୍ତ୍ରୀ, କାର୍ଯ୍ୟନିର୍ବାହୀ ଅଧିକାରୀ ଓ ସରପଞ୍ଚ ଏହି ଦୁର୍ନୀତିରେ ସାମିଲ ଅଛନ୍ତି ବୋଲି ଗ୍ରାମବାସୀମାନେ ଅଭିଯୋଗ କରି ସରପଞ୍ଚ ଓ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀଙ୍କୁ ଝିଙ୍କିରିଆ ହାଇସ୍କୁଲରେ ଅନୁଷ୍ଠିତ ଏକ ପଲ୍ଲିସଭାରେ ଅଟକ ରଖିଥିଲେ। ଏନେଇ ବିଡିଓଙ୍କୁ ପଚରାଯିବାରୁ ସେ କ୍ୟାମେରା ଆଗରେ କୌଣସି ପ୍ରତିକ୍ରିୟା ଦେବାକୁ ରୋକଠୋକ ମନା କରିଦେଇଥିଲେ ।
ତେବେ କିଛି ଦିନ ପୂର୍ବରୁ ମହାତ୍ମାଗାନ୍ଧୀ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନାରେ ଘୋଟାଲାରେ ଜଶିପୁର ବ୍ଲକର ସରକାରୀ ଅଧିକାରୀଙ୍କ ସହ ଜନ ପ୍ରତିନିଧିଙ୍କୁ ଜେଲ ଯିବାକୁ ପଡିଥିଲା । ବରକନ୍ଦ ଗ୍ରାମପଞ୍ଚାୟତରେ ହୋଇଥିବା ଦୁର୍ନୀତିର ତଦନ୍ତ ପରେ ସଂପୃକ୍ତ ଅଧିକାରୀଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି କରିଛନ୍ତି ପଞ୍ଚାୟତବାସୀ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
