ବାରିପଦା: କେବଳ ଧର୍ମେନ୍ଦ୍ର ନୁହନ୍ତି, ଗୋଟିଏ ଦିନରେ ମୟୂରଭଞ୍ଜରେ ମଧ୍ୟ ରୋଡ ଶୋ' କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଜି(ବୁଧବାର) ଅପରାହ୍ଣରେ ଜିଲ୍ଲାର ବୈଶିଙ୍ଗାଠାରୁ ନିଜ ରୋଡ ଶୋ' ଆରମ୍ଭ କରିଥିଲେ ମୁଖ୍ୟମନ୍ତ୍ରୀ । ବୈଶିଙ୍ଗା ଠାରୁ ମାଣିତ୍ରୀ, ବଡସାହି, ଡୁକୁରା, ସାନକେରକୋ ହୋଇ ବାରିପଦାସ୍ଥିତ ବିର୍ସାମୁଣ୍ଡା ଛକରେ ପହଞ୍ଚିଥିଲା ରୋଡ ଶୋ' ।
ସେଠାରେ ତାଙ୍କୁ ଦଳୀୟ କର୍ମୀମାନେ ତାଙ୍କୁ ସ୍ବାଗତ କରିଥିଲେ । ସେଠାରୁ ରୋଡ ଶୋ'ରେ ବାରିପଦା ସହର ପରିକ୍ରମା କରିଛନ୍ତି ନବୀନ । ରାଜ୍ୟ ସରକାରଙ୍କ ବିଭିନ୍ନ ଲୋକାଭିମୁଖୀ ଯୋଜନା ସମ୍ପର୍କରେ ଅବଗତ କରିବା ସହିତ କେନ୍ଦ୍ର ସରକାରର ଅପାରଗତା ସମ୍ପର୍କରେ ଜନସାଧାରଣଙ୍କୁ କହିଛନ୍ତି ମୁଖ୍ୟମନ୍ତ୍ରୀ ।
ରାଜ୍ୟରେ ଶଙ୍ଖ ଚିହ୍ନରେ ଭୋଟ ଦେଇ ବିଜେଡିକୁ ପୁଣିଥରେ ସରକାରକୁ ଆଣିବାକୁ ଲୋକଙ୍କୁ ଅନୁରୋଧ କରିଛନ୍ତି ସେ । ଆଜି ମୁଖ୍ୟମନ୍ତ୍ରୀ ବାରିପଦାରେ ରାତ୍ରି ଯାପନ କରି ଆସନ୍ତାକାଲି ଶ୍ରୀଜଗନ୍ନାଥଙ୍କ ଦର୍ଶନ କରିବା ସହିତ ଜିଲ୍ଲାର ଅନ୍ୟାନ୍ୟ ଅଞ୍ଚଳରେ ରୋଡ ଶୋ' ଏବଂ ଦଳୀୟ କାର୍ଯ୍ୟକ୍ରମରେ ଯୋଗ ଦେବାର କାର୍ଯ୍ୟକ୍ରମ ରହିଛି । ମୁଖ୍ୟମନ୍ତ୍ରୀଙ୍କ ସହ ମୟୂରଭଞ୍ଜ ସାଂସଦ ପ୍ରାର୍ଥୀ ଦେବାଶିଷ ମାରାଣ୍ଡି, ବାଙ୍ଗିରୀପୋଷି ବିଧାୟକ ପ୍ରାର୍ଥୀ ସୁଦାମ ମାରାଣ୍ଡି, ବାରିପଦା ବିଧାୟକ ପ୍ରାର୍ଥୀ ସରୋଜିନି ହେମ୍ବ୍ରମ ରୋଡ଼ ଶୋ'ରେ ସାମିଲ ହୋଇଥିଲେ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତୀ, ଇଟିଭି ଭାରତ
