ରାଇରଙ୍ଗପୁର: ନିୟନ୍ତ୍ରଣ ହରାଇ ଘର ଭିତରକୁ ମାଡିଗଲା କାର, ଅଳ୍ପକେ ବର୍ତ୍ତିଲେ ପରିବାର ଲୋକେ । ଏପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଗ୍ରାମାଞ୍ଚଳ ଥାନା ଅନ୍ତର୍ଗତ ବଡାମତଳିଆ ଗ୍ରାମରେ ।
ସୂଚନା ଅନୁଯାୟୀ, ଗତକାଲି(ସୋମବାର) ରାତିରେ ଏକ କାର ରାଇରଙ୍ଗପୁରକୁ ଆସୁ ଥିବାବେଳେ ବଡାମତଳିଆ ଗ୍ରାମ ଛକ ନିକଟରେ ଥିବା ବାଙ୍କରେ ଭାରସାମ୍ୟ ହରାଇ ସେଠାରେ ଛିଡ଼ା ହୋଇଥିବା ଗୋଟିଏ କାରକୁ ଧକ୍କା ଦେଇ ଯୁଧିଷ୍ଠିର ପରିଡ଼ାଙ୍କ ଘର ଉପରେ ମାଡି ଯାଇଥିଲା । ତେବେ ଘର ସମ୍ମୁଖରେ କେହି ନ ଥିବାରୁ ଅଳ୍ପକେ ପରିବାର ଲୋକେ ବର୍ତ୍ତି ଯାଇଛନ୍ତି । ଏଥିରେ ଯୁଧିଷ୍ଠିରଙ୍କ ଘର କ୍ଷତିଗ୍ରସ୍ତ ହୋଇଥିବା ଜଣାପଡିଛି । ସେପଟେ କାର ଚାଳକ ଅନୀଲ ଗିରି ଦୁର୍ଘଟଣାରେ ଗୁରୁତର ଆହତ ହୋଇ ଥିବାବେଳେ ତାଙ୍କୁ ଅଗ୍ନିଶମ ବାହିନୀ ଉଦ୍ଧାର କରି ରାଇରଙ୍ଗପୁର ଡାକ୍ତରଖାନା ଭର୍ତ୍ତି କରିଛନ୍ତି । ଏନେଇ ଖବର ପାଇ ଗ୍ରାମାଞ୍ଚଳ ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
