ବାରିପଦା: ଝାରପୋଖରୀଆ ଥାନା ଅଧିନସ୍ଥ ଶଙ୍କୁଚା ଗାଁ ନିକଟରେ ସଡକ ଦୁର୍ଘଟଣା । ବାଙ୍ଗିରିପୋଷିରେ ଥିବା ମାଆ ଦ୍ବାରଶୁଣୀଙ୍କ ପୀଠ ପରିଦର୍ଶନ କରି ଫେରୁଥିବା ସମୟରେ ଏକ କେଟିଏମ ଡ୍ୟୁକ ବାଇକ ଜଣେ ଯୁବକଙ୍କୁ ଧକ୍କା ଦେଇଥିଲା । ଦୁର୍ଘଟଣାରେ ବାଇକ ଆରୋହୀ ହୃଦୟ ରଞ୍ଜନ ପାଣିଗ୍ରାହୀ ଓ ଉମାକାନ୍ତ ଗୁରୁତର ହୋଇ ବାରିପଦା ମେଡିକାଲରେ ଭର୍ତ୍ତି ହୋଇଛନ୍ତି ।
ଭିଡିଓ ସୌଜନ୍ୟ: ସମ୍ବାଦଦାତା, ମୟୂରଭଞ୍ଜ
ସୂଚନାନୂଯାୟୀ, କେଟିଏମ କମ୍ପାନୀ ପକ୍ଷରୁ ମୋଟ ୧୨ ଜଣ ବାଇକ ମାଲିକଙ୍କ ପାଇଁ ବାଙ୍ଗିରିପୋଷି ଦ୍ବାରଶୁଣୀ ଘାଟି ବୁଲିବାକୁ ସୁଯୋଗ ମିଳିଥିଲା । ୧୨ ଜଣ ବାଇକ ଆରୋହୀ ଦ୍ବାରଶୁଣୀ ପୀଠ ପରିଦର୍ଶନ ସାରି ଫେରୁଥିବା ସମୟରେ ଓଡି-୦୧-ଜେଡ-୦୫୩୦ ନମ୍ବର ବିଶିଷ୍ଟ ଏକ କେଟିଏମ ଉମାକାନ୍ତଙ୍କୁ ଧକ୍କା ଦେଇଥିଲା ।
ଖବରପାଇ ଦୁର୍ଘଟଣାସ୍ଥଳରେ ଝାରପୋଖରୀଆ ପୋଲିସ ପହଞ୍ଚି ଦୁର୍ଘଟଣା ଘଟାଇ ଥିବା ଗାଡ଼ିକୁ ଥାନାରେ ଅଟକ ରଖିବା ସହ ତଦନ୍ତ ଜାରି ରଖିଥିବା ଏସ.ଆଇ ନିତ୍ୟାନନ୍ଦ ଦାସ କହିଛନ୍ତି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
