ରାଇରଙ୍ଗପୁର: ମୟୂରଭଞ୍ଜ ଜିଲ୍ଲାର ଟେଣ୍ଟିପୋଷି ଅଙ୍ଗନବାଡି କେନ୍ଦ୍ରରେ ଅଣ୍ଡା ବଣ୍ଟନକୁ ନେଇ ଅଙ୍ଗନବାଡି କର୍ମୀଙ୍କୁ ମାଡ ମରାଯାଇଛି । ଏ ଅଭିଯୋଗରେ ସେକ୍ ଅହମ୍ମଦକୁ ଗିରଫ କରିବାକୁ ଦାବି କରିଛନ୍ତି କୁସୁମୀ ବ୍ଲକର ସମସ୍ତ ଅନଙ୍ଗବାଡି କର୍ମୀ । ଏନେଇ ରାଇରାଙ୍ଗପୁର ଉପଜିଲ୍ଲାପାଳଙ୍କୁ ମଧ୍ୟ ଏକ ଦାବି ପ୍ରଦାନ କରିଛନ୍ତି।
ଗତ 5 ତାରିଖରେ ଟେଣ୍ଟରପୋଷି ଗାଁରେ ଅଙ୍ଗନବାଡି କର୍ମୀ ମନ୍ଦଦୋରୀ ପ୍ରସୂତୀ ମହିଳାଙ୍କୁ ଅଣ୍ଡା ବାଣ୍ଟୁ ଥିବା ସମୟରେ ସେହି ଗାଁର ସେକ ଅହମ୍ମଦ ଆସି ଅଣ୍ଡା ମାଗିଥିଲେ । ଏହା ପରେ ଅଙ୍ଗନବାଡି କର୍ମୀଙ୍କ ଯୁକ୍ତତର୍କ କରିବା ସହ ମାଡ ମାରି କଚାଡି ଦେଇଥିଲେ । ଫଳରେ ଗୁରୁତର ଅବସ୍ଥାରେ ଅଙ୍ଗନବାଡି କର୍ମୀ ମନ୍ଦଦୋରୀଙ୍କୁ ରାଇରଙ୍ଗପୁର ଡାକ୍ତରଖାନା ପରେ ବାରିପଦା ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜକୁ ସ୍ଥାନାନ୍ତର କରାଯାଇଥିଲା ।
ଏ ନେଇ କୁସୁମୀ ବ୍ଲକର ପ୍ରାୟ 231 ଅଙ୍ଗନବାଡି କେନ୍ଦ୍ରର କର୍ମୀ ଏକତ୍ରୀତ ହୋଇ ଘଟଣାର ତୀବ୍ର ନିନ୍ଦା କରିବା ସହିତ ଅଭିଯୁକ୍ତକୁ ଯଥାଶୀଘ୍ର ଗିରଫ କରିବା ଦାବିରେ ରାଇରଙ୍ଗପୁର ଉପଜିଲ୍ଲାପାଳଙ୍କୁ ଏକ ଦାବି ପତ୍ର ପ୍ରଦାନ କରିଛନ୍ତି । ତେବେ ଜଣେ କାର୍ଯ୍ୟରତ ଅଙ୍ଗନବାଡିଙ୍କୁ ମାଡ ମାରିବା ତାଙ୍କ କାର୍ଯ୍ୟରେ ବାଧା ଦେବା ବେଆଇନ ହୋଇଥିଲେ ମଧ୍ୟ ପୋଲିସ କାହିଁକି ଚୁପ୍ ପଡିଛି ତାକୁ ନେଇ ପ୍ରଶ୍ନ ଉଠିଛି।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
