ବାରିପଦା: ଜାତୀୟ ନାଗରିକ ପଞ୍ଜିକରଣ(ଏନଆରସି)କୁ ବିରୋଧ କରି ମୟୁରଭଞ୍ଜ ଯୁବ କଂଗ୍ରେସ ପକ୍ଷରୁ ସାମ୍ବାଦିକ ସମ୍ମିଳନୀ। ଏନଆରସି ପରିବର୍ତ୍ତେ ବେକାର ଯୁବକ ଯୁବତୀଙ୍କୁ ନିଯୁକ୍ତ ଦେବା ଦରକାର ବୋଲି କହିଛି ଯୁବ କଂଗ୍ରେସ।
ଏନେଇ ମଙ୍ଗଳବାର ମୟୂରଭଞ୍ଜ ଜିଲ୍ଲାରେ ମଧ୍ୟ ଏନଆରସିକୁ ବିରୋଧ ସହ ବେକାର ଯୁବକ ଯୁବତୀଙ୍କୁ ରୋଜଗାର ଦାବିରେ ଜିଲ୍ଲା ଯୁବ କଂଗ୍ରେସ ସଭାପତି ରାକେଶ ସିଂ ବାରିପଦା ଅବସରପ୍ରାପ୍ତ କର୍ମଚାରୀ ଭବନରେ ସାମ୍ବାଦିକ ସମ୍ମିଳନୀର ଆୟୋଜନ କରିଥିଲେ ।
ଦେଶରେ ଏନଆରସିକୁ ନେଇ ବାବ ବିବାଦ ଲାଗି ଥିବାବେଳେ ଭାରତୀୟ ଯୁବ କଂଗ୍ରେସ ଦ୍ବାରା ନ୍ୟାସନାଲ ରେଜିଷ୍ଟାର ଅଫ ଅନଏମ୍ପ୍ଲୟମେଣ୍ଟ (ଏନଆରୟୁ) ନାମକ ଏକ ରାଷ୍ଟ୍ରବ୍ୟାପୀ ପ୍ରଚାର ଅଭିଯାନ ଆରମ୍ଭ କରାଯାଇଛି।
କେନ୍ଦ୍ରର ବିଜେପି ସରକାର ଏବଂ ରାଜ୍ୟର ବିଜେଡି ସରକାର ଶିକ୍ଷିତ ଯୁବକ ଯୁବତୀମାନଙ୍କୁ ନିଯୁକ୍ତି ଦେବାରେ ସଂମ୍ପୂର୍ଣ୍ଣ ବିଫଳ ହୋଇଛନ୍ତି । ଓଡିଶାରେ ତଥା ସମଗ୍ର ଦେଶରେ ଜାତୀୟ ବେରୋଜଗାରଙ୍କୁ ଉପଯୁକ୍ତ ଥଇଥାନର ଆବଶ୍ୟକତା ନିତ୍ୟାନ୍ତ ଦରକାର ବୋଲି ଯୁବ କଂଗ୍ରେସ ଅଭିଯୋଗ କରିଛି।
ଅନ୍ୟପକ୍ଷରେ ଆଗାମୀ ଦିନରେ କାର୍ଯ୍ୟକାରୀ ହେବାକୁ ଥିବା ବିଭିନ୍ନ ଖଣିରେ ମୟୁରଭଞ୍ଜ ଜିଲ୍ଲାର ୮୦ ପ୍ରତିଶତ ଲୋକଙ୍କୁ ନିଯୁକ୍ତି ଦିଆ ନଗଲେ ଯୁବ କଂଗ୍ରେସ ପକ୍ଷରୁ ଆନ୍ଦୋଳନକୁ ଜୋରଦାର କରାଯିବ ବୋଲି ଚେତାବନୀ ଦେଇଛନ୍ତି ଯୁବ କଂଗ୍ରେସ ସଭାପତି ରାକେଶ ସିଂ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
