ବାରିପଦା: ଦେଖୁ ଦେଖୁ ଆଖି ଆଗରେ ବାଇକ ସହ ଭାସିଗଲେ ଯୁବକ । ଏମିତି ଘଟଣା ଘଟିଛି ବାରିପଦା ସହରରେ । ଶନିବାର ଦ୍ବିପ୍ରହରରେ ବାରିପଦା ସହରରେ ପ୍ରାୟ ଏକ ଘଣ୍ଟା ଧରି ବାଦଲ ଫଟା ବର୍ଷା ଯୋଗୁଁ ଶୁକଯୋଡ଼ ନାଳରେ ପାଣି ବଢି ଯାଇଥିଲା । ତେବେ ଜଣେ ଯୁବକ ନିଜ ବାଇକରେ ଶୁକଯୋଡ଼ ନାଳ ପୋଲ ପାରି ହେଉଥିବା ବେଳେ ଭାସି ଯାଇଥିବା ସ୍ଥାନୀୟ ଲୋକେ କହିଛନ୍ତି ।
ଶୁକଯୋଡ଼ ନାଳରେ ଅଘଟଣ, ଦେଖୁ ଦେଖୁ ବାଇକ ସହ ଭାସିଗଲେ ଯୁବକ
୧୯ନଂ ୱାର୍ଡରୁ ୧୭ ନମ୍ବର ୱାର୍ଡକୁ ସଂଯୋଗ କରୁଥିବା ଶୁକଯୋଡ଼ ପୋଲ ପାରି ହେଉଥିବା ସମୟରେ ଏଭଳି ଅଭାବନୀୟ ଘଟଣା ଘଟିଛି । ଖବର ପାଇ ବାରିପଦା ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଥିଲେ ବି ଯୁବକଙ୍କ ବର୍ତ୍ତମାନ ସୁଦ୍ଧା କୌଣସି ପତ୍ତା ମିଳି ପାରିନାହିଁ । ଏପଟେ ଭାସିଯାଇଥିବା ଯୁବକଙ୍କ ଏଯାବତ କୌଣସି ପରିଚୟ ମିଳି ନଥିବା ବେଳେ ବାରିପଦା ଟାଉନ ଥାନା ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
