ବାରିପଦା: ଯୌତୁକ ପାଇଁ ନବବଧୂକୁ ହତ୍ୟା । ମୟୂରଭଞ୍ଜ ଜିଲ୍ଲା କପ୍ତିପଦା ଥାନା ଉପରଖୁଣ୍ଟା ଗାଁରେ ଜଣେ ନବବଧୂଙ୍କୁ ଯୌତୁକ ପାଇଁ ହତ୍ୟା କରିଥିବା ପରିବାର ଲୋକେ ଅଭିଯୋଗ କରିଛନ୍ତି ।
ସୂଚନା ଅନୁଯାୟୀ, ଗତ ଏକ ମାସ ତଳେ ଭଦ୍ରକ ଜିଲ୍ଲା ରାଣୀତାଲ ଅଞ୍ଚଳର ୧୫ ବର୍ଷୀୟ ନାବାଳିକା ମାନ ଖିଲାରଙ୍କୁ ମୟୂରଭଞ୍ଜ କପ୍ତିପଦା ଥାନା ଉପରଖୁଣ୍ଟା ଗ୍ରାମର ରବି ଖିଲାର ପ୍ରେମ ବିବାହ କରିଥିଲେ । ବିବାହର ଏକ ମାସ ପରେ ଗତ ରବିବାର ମାନ ଖିଲାରଙ୍କ ମୃତ୍ୟୁ ହୋଇଥିବା ତାଙ୍କ ବାପଘର ଲୋକେ ଖବର ପାଇ ଉପରଖୁଣ୍ଟା ଗ୍ରାମରେ ପହଞ୍ଚିଥିଲେ ।
ଏହା ସହିତ ମୃତଙ୍କ ଶରୀରର ମୁଣ୍ଡ ଏବଂ ଛାତିରେ କ୍ଷତ ଚିହ୍ନ ରହିଥିବା ଦେଖିବାକୁ ପାଇଥିଲେ । ଏପଟେ ବିବାହର ଏକ ମାସ ମଧ୍ୟରେ ମାନ ଖିଲାରଙ୍କ ଶଶୁର ଘର ଲୋକେ ତାଙ୍କୁ ଘରୁ ଏକ ଲକ୍ଷ ଟଙ୍କା ମାଗିଥିବା ତାଙ୍କ ଭାଇ କହିଛନ୍ତି । ସେହି ଟଙ୍କା ନ ଦେଇପାରିବାରୁ ତାଙ୍କ ଭଉଣୀଙ୍କୁ ହତ୍ୟା କରାଯାଇଥିବା ନେଇ ମୃତକଙ୍କ ଭାଇ କପ୍ତିପଦା ଥାନାରେ ଏକ ଲିଖିତ ଅଭିଯୋଗ କରିଛନ୍ତି ।
ଅଭିଯୋଗକୁ ଆଧାର କରି ପୋଲିସ ରବି ଖିଲାରକୁ ଥାନାରେ ଅଟକ ରଖାଯାଇଛି । ଅନ୍ୟପଟେ ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ନିମନ୍ତେ ପଠାଇଥିବାବେଳେ ଘଟଣାର ତଦନ୍ତ ଆରମ୍ଭ କରିଛି ପୋଲିସ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
