ରାଇରଙ୍ଗପୁର: ଜିଲ୍ଲାରେ ପୁଣି ଲଜ୍ଜା ଜନକ ଘଟଣା ସାମ୍ନାକୁ ଆସିଛି । 3 ବର୍ଷର ଶିଶୁକନ୍ୟା ଦୁଷ୍କର୍ମର ଶିକାର ହୋଇଥିବା ଅଭିଯୋଗ ହୋଇଛି। ଏପରି ଏକ ଲଜ୍ଜାଜନକ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଗ୍ରାମାଞ୍ଚଳ ଥାନା ଅଞ୍ଚଳରେ। ତେବେ ଦୁଷ୍କର୍ମକାରୀ ଜଣେ ନାବାଳକ ହୋଇଥିବା ଜଣା ପଡିଛି ।
ସୂଚନା ଅନୁଯାୟୀ ଗତ ୨୭ ତାରିଖ ଅଞ୍ଚଳରେ ଫୁଲପୂଜା ପର୍ବ ହେଉଥିବାବେଳେ ସନ୍ଧ୍ୟା ସମୟରେ ସେହି ଗ୍ରାମର ଜନୈକ ନାବାଳକ ଶିଶୁକନ୍ୟାକୁ ଫୁଲପୂଜା ଦେଖାଇବାକୁ ନେଇଯାଇ ଦୁଷ୍କର୍ମ କରିଥିଲା। ଏପରିକି ବାପା,ମାଆ ଶିଶୁକନ୍ୟାକୁ ଖୋଜାଖୋଜି କରି ନପାଇ ରାତି ପ୍ରାୟ 9 ଟା ବେଳେ ଘରକୁ ଫେରିଥିଲେ । ତେବେ ସେମାନେ ଘରେ ପହଞ୍ଚିବା ପୂର୍ବରୁ ଉକ୍ତ ନାବାଳକଟି ନାବାଳିକାକୁ ଘରେ ଛାଡି ଦେଇ ପଳାଇଥିବା ଶିଶୁକନ୍ୟାର କକା ପ୍ରକାଶ କରିଥିଲେ। ତେବେ ଶିଶୁକନ୍ୟାଟିକୁ ରକ୍ତାକ୍ତ ଅବସ୍ଥାରେ ଦେଖିବାକୁ ପାଇ ତୁରନ୍ତ ତାଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରି ରାଇରଙ୍ଗପୁର ଗ୍ରାମାଞ୍ଚଳ ଥାନା ପୋଲିସକୁ ଖବର ଦେଇଥିଲେ ପରିବାର ଲୋକେ ।
ଖବର ପାଇ ରାଇରଙ୍ଗପୁର ଗ୍ରାମାଞ୍ଚଳ ଥାନା ପୋଲିସ ଜନୈକ ନାବାଳକକୁ ଥାନାକୁ ଆଣି ପଚରାଉଚରା କରି ଘଟଣାର ସତ୍ୟାସତ୍ୟ ଜାଣିବାକୁ ପାଇଥିଲା। ଆଜି ଅଭିଯୁକ୍ତ ନାବାଳକକୁ ବାରିପଦା ଜୁଭେନାଇଲ କୋର୍ଟରେ ହାଜର କରାଯିବା ପରେ ଅନୁଗୋଳ ସ୍ଥିତ ବାଳ ସୁଧାର ଗୃହକୁ ପଠାଇ ଦିଆଯାଇଛି।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
