ରାଇରଙ୍ଗପୁର: ସାମାନ୍ୟ ବଚସାକୁ କେନ୍ଦ୍ର କରି ଜଣେ ନାବାଳକ ଓ ଯବାନଙ୍କ ମଧ୍ୟରେ ରକ୍ତାକ୍ତ ସଂଘର୍ଷ ଘଟିଛି । ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଟାଉନ ଥାନା ଅଧୀନ ରାଇରଙ୍ଗପୁର ବସଷ୍ଟାଣ୍ଡରେ ଘଟିଛି ଏଭଳି ଏକ ଅଭାବନୀୟ ଘଟଣା । ଏଥିରେ ଗୁରୁତର ଯବାନଙ୍କୁ ଚିକିତ୍ସିତ କରାଯାଉଛି ।
ଯବାନ ଜଣକ କେନ୍ଦୁଝର ଅଞ୍ଚଳର ଦେବାଶିଷ ସୋରେନ ବୋଲି ଜଣାପଡ଼ିଛି । ସେ ଛୁଟିରେ ଘରକୁ ଫେରୁଥିବା ବେଳେ ରାଇରଙ୍ଗପୁର ବସଷ୍ଟାଣ୍ଡରେ ଜଣେ ନାବାଳକଙ୍କ ସହିତ କୌଣସି କଥାକୁ ନେଇ ବଚସା ହୋଇଥିଲା । ପରେ ଉଭୟଙ୍କ ମଧ୍ୟରେ ମାଡପିଟ ଆରମ୍ଭ ହୋଇଥିବା ବେଳେ ଘଟଣା ଛୁରାମାଡ ପର୍ଯ୍ୟନ୍ତ ଯାଇଥିଲା ।
ଯେଉଁଥିରେ ଦେବାଶିଷଙ୍କ ପିଠିରେ ଛୁରାମାଡ ହୋଇଥିବା ବେଳେ ନାବାଳକ ଜଣକ ମଧ୍ୟ ଆହତ ହୋଇଛନ୍ତି । ଖବର ପାଇ ରାଇରଙ୍ଗପୁର ଟାଉନ ଥାନା ପୋଲିସ ଯବାନ ଓ ନାବାଳକଙ୍କୁ ଘଟଣାସ୍ଥଳରୁ ଉଦ୍ଧାର କରି ରାଇରଙ୍ଗପୁର ଡାକ୍ତରଖାନାରେ ଭର୍ତ୍ତି କରିଥିଲେ । ତେବେ ନାବାଳକ ଜଣକ ସାମାନ୍ୟ ଆହତ ହୋଇଥିବାରୁ ପ୍ରାଥମିକ ଚିକିତ୍ସା ପରେ ତାଙ୍କୁ ଥାନାରେ ଅଟକ ରଖି ପୋଲିସ ଘଟଣାର ତଦନ୍ତ ଚଳାଇଛି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
