ବାରିପଦା: କୋରୋନା ଭୟରେ ହଜିଯାଉଛି ମାନବିକତା। କୋରୋନା ଭୂତାଣୁକୁ ଡରି ଶବ ସତ୍କାର ପାଇଁ ଆସିଲେନି ଗ୍ରାମବାସୀ। ମୟୂରଭଞ୍ଜ ଜିଲ୍ଲା କପ୍ତିପଦା ଥାନା କଟୁରିଆ ଗାଁ ଚତୁରୀସାହିର ଦାସ ମୁର୍ମୁ ଦୀର୍ଘଦିନ ହେବ ସୁଦୂର ଗୁଜୁରାଟରେ ଏକ ଘରୋଇ କମ୍ପାନୀରେ ଶ୍ରମିକ ଭାବେ କାମ କରୁଥିଲେ । ତେବେ ସେ ଦୀର୍ଘଦିନ ହେବ କିଡ଼ନୀ ରୋଗରେ ପୀଡିତ ଥିଲେ ବୋଲି ଜଣାପଡିଛି ।
ମାତ୍ର ଲକଡାଉନ ସମୟରେ ଗୁଜୁରାଟରେ ଦାସଙ୍କ ଚିକିତ୍ସା ହୋଇ ନପାରିବାରୁ ଗତ ମେ ୧ ରେ ଗୁଜୁରାଟରେ ସେ ମୃତ୍ୟୁବରଣ କରିଥିଲେ। ଦାସଙ୍କ ମୃତ୍ୟୁ ପରେ କମ୍ପାନୀ ପକ୍ଷରୁ ଦାସଙ୍କ ମରଶରୀରକୁ ଗୁଜୁରାଟରୁ ନିଜ ଗାଁକୁ ଅଣାଯାଇଥିଲା । ବୁଧବାର ଦାସଙ୍କ ମରଶରୀର କଟୁରିଆ ଗାଁ ଚତୁରୀ ସାହିରେ ବିଳମ୍ବିତ ରାତିରେ ପହଞ୍ଚିଥିଲା।
ମରଶରୀର ପହଞ୍ଚିବା ପରେ କୋରୋନା ସଂକ୍ରମଣ ଭୟରେ ଗ୍ରାମବାସୀ ଦାସଙ୍କ ଶବକୁ ଛୁଇଁ ବା ତ ଦୂରର କଥା, ଦେଖିବାକୁ ବି ଆସି ନଥିଲେ। ଶେଷରେ ଦାସଙ୍କ ବଡଭାଇ ଓ ନିଜ ପରିବାରର କିଛି ଲୋକଙ୍କ ସାହାଯ୍ୟରେ ଶବକୁ ମାଟିରେ ପୋତିଥିବା ଜଣାପଡିଛି ।
ମୟୂରଭଞ୍ଜରୁ ମୃତ୍ଯୁଞ୍ଜୟ ସେନାପତି, ଇଟିଭି ଭାରତ
