ରାଇରଙ୍ଗପୁର: ସାପ କାମୁଡାରେ ପ୍ରାଣ ହରାଇଲା ଜଣେ 7 ବର୍ଷର ଶିଶୁକନ୍ୟା। ମୟୂରଭଞ୍ଜ ଜିଲ୍ଲା ବାଦାମପାହାଡ ଥାନା ଅଧିନରେ ଥିବା ଧଡିଚୁଆ ଗ୍ରାମରେ ଘଟିଛି ଏଭଳି ଘଟଣା । ମୃତ ଶିଶୁଟି ସେହି ଗ୍ରାମର ମାଟାଇ ପିଙ୍ଗୁଆଙ୍କ ଝିଅ ଦ୍ରୌପଦୀ ପିଙ୍ଗୁଆ ବୋଲି ଜଣାପଡିଛି ।
ସୂଚନା ଅନୁସାରେ, ଦ୍ରୌପଦୀ ଗତକାଲି ରାତିରେ ନିଜ ଭାଇ ଭଉଣୀଙ୍କ ସହ ତଳେ ଶୋଇଥିଲେ। ଭୋର ପ୍ରାୟ ୪ଟା ସମୟରେ ଏକ ବିଷଧର ସାପ ତାକୁ ଚୋଟ ମାରୁଥିବା ବାପା ଦେଖିଥିଲେ । ତେବେ ସେ ଡାକ୍ତରଖାନା ବଦଳରେ ଝିଅକୁ ଏକ ଗୁଣିଆ ପାଖକୁ ନେଇଥିଲେ। ଝିଅ ସୁସ୍ଥ ନହେବାରୁ ସକାଳ ୯ ସମୟରେ ତାକୁ ବାଦାମପାହାଡ ଡାକ୍ତରଖାନାକୁ ନିଆଯାଇଥିଲା ।
କିନ୍ତୁ ସେଠାରେ ଡାକ୍ତର ଝିଅକୁ ରାଇରଙ୍ଗପୁର ଡାକ୍ତରଖାନା ସ୍ଥାନାନ୍ତର କରିବାରୁ ପରାମର୍ଶ ଦେଇଥିଲେ । ପରିବାର ଲୋକେ ତାକୁ ତୁରନ୍ତ ରାଇରଙ୍ଗପୁର ଡାକ୍ତରଖାନା ନେଇଥିଲେ ମଧ୍ୟ ଡାକ୍ତର ସେଠାରେ ତାକୁ ମୃତ ଘୋଷଣା କରିଥିଲେ। ଏ ନେଇ ବାଦାମପାହାଡ ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇବା ସହିତ ମୃତଦେହକୁ ଶବ ବ୍ୟବଚ୍ଛେଦ ପାଇଁ ରାଇରଙ୍ଗପୁର ଡାକ୍ତରଖାନା ପଠାଇଥିଲା।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
