ରାଇରଙ୍ଗପୁର: ସର୍ପ ଦଂଶନରେ ସପ୍ତମ ଶ୍ରେଣୀ ଛାତ୍ରୀଙ୍କ ମୃତ୍ୟୁ। ଏପରି ଏକ ଦୁଃଖଦ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ଗୋରୁମହିଷାଣି ଥାନା ଅଧିନରେ ଥିବା ହାତିଆ ଗ୍ରାମରେ । ମୃତ ଛାତ୍ରୀ ଜଣକ ହେଲା ହାତିଆ ଗ୍ରାମର ସତେଶ ଗିରିଙ୍କ ଝିଅ ସୁମି ଗିରି ।
ସୂଚନା ଅନୁଯାୟୀ, ରବିବାର ସନ୍ଧ୍ୟା ସମୟରେ ସୁମି ଘରେ ଥିବା ଆଲମାରୀ ଖୋଲିବା ପାଇଁ ଯାଇଥିଲେ। ତେବେ ଆଲମାରୀ ଉପରେ ଥିବା ଚାବିକାଠି ବାହାର କରିବା ପାଇଁ ବାମ ହାତରେ ଚାବିକାଠି ଖୋଜୁଥିବା ସମୟରେ ଏକ ନାଗ ସାପ ତାଙ୍କ ହାତକୁ ଦଂଶନ କରିଥିଲା ।
ଏ ନେଇ ପରିବାର ଲୋକେ ଜାଣିବାରୁ ତୁରନ୍ତ ବନବିଭାଗକୁ ଡାକିଥିଲେ ଏବଂ ଝିଅକୁ ଏକ ଗୁଣିଆ ପାଖକୁ ନେଇଥିଲେ । ବନବିଭାଗ ତାଙ୍କ ଘରେ ପହଞ୍ଚି ନାଗ ସାପକୁ ଉଦ୍ଧାର କରି ନିକଟସ୍ଥ ସଂରକ୍ଷିତ ଜଙ୍ଗଲରେ ଛାଡି ଦେଇଥିଲେ ।
ସେପଟେ ସଚେତନତାର ଅଭାବ ଯୋଗୁଁ ଝିଅକୁ ବଞ୍ଚାଇବା ପାଇଁ ପରିବାର ଲୋକେ ଡାକ୍ତରଖାନାକୁ ନ ନେଇ ଦୁଇ ତିନି ଜାଗା ଗୁଣିଗାରେଡି କରେଇବା ପରେ ସେଥିରେ ସଫଳ ନହୋଇ ରାତି ପ୍ରାୟ ୧୦ଟା ସମୟରେ ରାଇରଙ୍ଗପୁର ଡାକ୍ତରଖାନା ଆଣିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ଏନେଇ ଗୋରୁମହିଷାଣି ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରି ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଥିବାବେଳେ ପୁଣି ପରିବାର ଲୋକେ ଅନ୍ୟ ଏକ ଗୁଣିଆ ପାଖକୁ ନେଇଯିବା ପାଇଁ ଆକୁଳ ନିବେଦନ କରୁଥିବା ଦେଖିବାକୁ ମିଳିଛି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
