ରାଇରଙ୍ଗପୁର : ବନ୍ଧୁକ ମୁନରେ ଲୁଟ। ମୟୁରଭଞ୍ଜ ଜିଲ୍ଲା ରାଇରଙ୍ଗପୁରରେ ବନ୍ଧୁକ ମୁନରେ ଲୁଟ। ବନ୍ଧୁକ ଦେଖାଇ ବ୍ୟବସାୟୀଙ୍କ ଠାରୁ 6ଲକ୍ଷ ଟଙ୍କା ଲୁଟ ହୋଇଛି । ରାଇରଙ୍ଗପୁର ଟାଉନ ଥାନା ମୁଖ୍ୟ ବଜାର ଜାରୁଲ ଏଣ୍ଟରପ୍ରାଇଜେସ ନାମକ ଏକ ହୋଲସେଲ ପାନ ମସଲା ଦୋକାନରେ ଲୁଟ ହୋଇଛି । ଗତକାଲି ରାତି ୧୧.୦୦ ଟା ସମୟରେ ଦୋକାନର ସାଟାର ବନ୍ଦ ଥିବା ବେଳେ ତିନି ଜଣ ଦୁର୍ବୁତ୍ତ ହଠାତ ଦୋକାନକୁ ପଶି ଆସି ବ୍ୟବସାୟୀ ଓ ଗ୍ରାହକଙ୍କୁ ବନ୍ଧୁକ ଦେଖାଇଥିଲେ ।
ଦୋକାନ ମାଲିକ ଜଣେ ଷ୍ଟାଫ ସହ ଦୋକାନରେ ଜଣେ ଗ୍ରାହକଙ୍କୁ ଜିନିଷ ଦେଉଥିବା ବେଳେ ତିନି ଜଣ ମୁଖା ପିନ୍ଧା ଦୁର୍ବୁତ୍ତ ତିନିଟି ବନ୍ଧୁକ ଧରି ପଶି ଆସି ବନ୍ଧୁକ ଦେଖେଇ ଥିଲେ । ତେବେ ଗୋଟିଏ ରାଉଣ୍ଡ ଗୁଳି ଫାଇରିଙ୍ଗ କରିଥିବା ଦୁକାନୀ ପ୍ରକାଶ କରିଥିବା ବେଳେ କାହାରିକୁ କିଛି ହୋଇନଥିବା ଜଣାପଡିଛି । ପୋଲିସ ଘଟଣାସ୍ଥଳରେ ପହଁଚି ଘଟଣାର ତଦନ୍ତ କରୁଛି ।
ତେବେ କିଛି ମାସ ପୂର୍ବରୁ ରାଇରଙ୍ଗପୁର ଲିଙ୍କ ରୋଡ଼ରେ ଧାନ ବ୍ୟବସାୟୀଙ୍କ ଉପରେ ଗୁଳିମାଡ ହୋଇଥିବା ଓ ଧରାପଡିନଥିବା ବେଳେ ପୁଣି ଏଭଳି ଘଟଣା ସାମନାକୁ ଆସିବା ପୋଲିସ ପ୍ରଶାସନ ପାଇଁ ଚିନ୍ତାର କାରଣ ପାଲଟିଛି । ଅନ୍ୟ ପଟେ ଝାଡ଼ଖଣ୍ଡ ସୀମାନ୍ତ ବର୍ତି ଅଂଚଳ ହୋଇଥିବା ନେଇ ଶାନ୍ତିର ସହର ରାଇରଙ୍ଗପୁରରେ ଏଭଳି ଘଟଣା ବାରମ୍ବାର ଘଟୁଥିବା ନେଇ ସାଧାରଣରେ ଚର୍ଚା ଚାଲିଛି।
ରାଇରଙ୍ଗପୁରରୁ ସଞ୍ଜୟ ପରିଡା,ଇଟିଭି ଭାରତ
