ରାଇରଙ୍ଗପୁର: କୁକୁଡା ଭାଡିରେ ଅଜଗର । ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ବନଖଣ୍ଡ ନାଉଯୋଡା ଗ୍ରାମରେ ଜଣେ ବ୍ୟକ୍ତିଙ୍କ କୁକୁଡା ଭାଡିରୁ ଛଅ ଫୁଟିଆ ଅଜଗର ସାପ ଉଦ୍ଧାର ହୋଇଛି । ଜଙ୍ଗଲ ବିଭାଗର କର୍ମଚାରୀ ସହର ଉପକଣ୍ଠରେ ଥିବା ଦୁବୁଲାବେଡା ସଂରକ୍ଷିତ ଜଙ୍ଗଲରେ ଅଜଗର ସାପଟିକୁ ଛାଡି ଦେଇଛନ୍ତି ।
ସୂଚନା ଅନୁଯାୟୀ, ନାଉଯୋଡା ଗାଁର ଚୈତନ କୁମ୍ଭକାରଙ୍କ କୁକୁଡା ଭାଡିରେ ଶିକାର ପାଇଁ ଏକ ଅଜଗର ସାପ ପଶିଥିଲା । ଯାହାଫଳରେ କୁକୁଡାମାନେ ଏଣେତେଣେ ଦୌଡିଥିଲେ । କୁକୁଡାଙ୍କୁ ଏଭଳି ଦେଖି ପରିବାର ଲୋକେ ସନ୍ଦେହରେ ଭାଡି ପାଖକୁ ଯିବା ସମୟରେ ସାପଟିକୁ ଦେଖିବାକୁ ପାଇଥିଲେ । ଖବର ପ୍ରଚାରିତ ହେବା କ୍ଷଣି ଘଟଣାସ୍ଥଳରେ ଲୋକଙ୍କ ଭିଡ ଜମିଥିଲା । ଖବର ପାଇ ରାଇରଙ୍ଗପୁର ପଶୁ ଡାକ୍ତରଖାନାର କର୍ମଚାରୀ ଚିରଞ୍ଜିବ ସିଂ ସେଠାକୁ ଯାଇ ସାପକୁ ଉଦ୍ଧାର କରିଥିଲେ ଏବଂ ରାଇରଙ୍ଗପୁର ରେଞ୍ଜ ଅଫିସରେ ଅଜଗରକୁ ହସ୍ତାନ୍ତର କରିଥିଲେ । ପରେ ଜଙ୍ଗଲ ବିଭାଗ କର୍ମଚାରୀ ସହର ଉପକଣ୍ଠରେ ଥିବା ଦୁବୁଲାବେଡା ସଂରକ୍ଷିତ ଜଙ୍ଗଲରେ ଅଜଗର ସାପଟିକୁ ଛାଡି ଦେଇଛନ୍ତି । ତେବେ ରାଇରଙ୍ଗପୁର ରେଞ୍ଜରେ ଜଣେ ତାଲିମପ୍ରାପ୍ତ ସାପ ଧରାଳିକୁ ନିଯୁକ୍ତି ପାଇଁ ସାଧାରଣରେ ଦାବି ହେଉଛି।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
