ରାଇରଙ୍ଗପୁର: ପବିତ୍ର ଜନ୍ମାଷ୍ଟମୀ ଉତ୍ସବ ପାଳନ ବେଳେ ଅଘଟଣ । ପୋଖରୀରେ ବୁଡି ଜଣେ 4 ବର୍ଷ ଶିଶୁର ମୃତ୍ୟୁ ହୋଇଛି । ଏଭଳି ହୃଦୟବିଦାରକ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ବହଳଦା ଥାନା ଅଧୀନରେ ଥିବା ଜାମବଣୀ ଗାଁରେ । ମୃତ ଶିଶୁ ସେହି ଗ୍ରାମର ଦୁର୍ଯ୍ୟୋଧନ ବେହେରା ଓ ପିଙ୍କି ବେହେରାଙ୍କ ଏକମାତ୍ର ପୁତ୍ର ଲକ୍ସି ବେହେରା ।
ସୂଚନାନୁଯାୟୀ, ଜାମବଣୀ ଗ୍ରାମବାସୀ ଗାଁରେ ଥିବା ସତ୍ସଙ୍ଗ ଗୃହରେ ଜନ୍ମାଷ୍ଟମୀ ଉତ୍ସବ ପାଳନ କରୁଥିଲେ । ଲକ୍ସି ନିଜ ମା'ଙ୍କ ସହିତ ଶ୍ରୀକୃଷ୍ଣ ଜନ୍ମାଷ୍ଟମୀର ଏହି ଉତ୍ସବ ଦେଖିବାକୁ ଆସିଥିଲା । କିନ୍ତୁ ବିଧିର ବିଧାନ କିଛି ଅଲଗା ଥିଲା । ଲକ୍ସି ସତ୍ସଙ୍ଗ ଗୃହ ବାହାରେ ଖେଳୁଥିବାବେଳେ ଭୁଲବଶତଃ ନିକଟରେ ଥିବା ପୋଖରୀକୁ ଯାଇ ବୁଡିଯାଇଥିଲା ।
ସେପଟେ ଲକ୍ସିକୁ ନପାଇ ମା’ ପିଙ୍କି ଓ ଗ୍ରାମବାସୀମାନେ ତାକୁ ଖୋଜିଖୋଜି କରିଥିଲେ । ପୋଖରୀରେ ତାର ମୃତଦେହ ଭାସୁଥିବାର ଦେଖି ତୁରନ୍ତ ଉଦ୍ଧାର କରି ରାଇରଙ୍ଗପୁର ଡାକ୍ତରଖାନାରେ ଭର୍ତ୍ତି କରିଥିଲେ । ମାତ୍ର ଡାକ୍ତର ଲକ୍ସିକୁ ସେଠାରେ ମୃତ ଘୋଷଣା କରିଥିଲେ । ଆଜି ଭଳି ଏକ ପବିତ୍ର ଦିନରେ ଏଭଳି ଅଘଟଣକୁ ନେଇ ଜାମବଣୀ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି । ସେପଟେ ବହଳଦା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଥିବା ଜଣାପଡିଛି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
