ରାଇରଙ୍ଗପୁର: ସାରା ଦେଶରେ କୋରୋନା କାୟା ବିସ୍ତାର କରି ଚାଲିଥିବା ବେଳେ ଏକମାତ୍ର ମାର୍ଗ ଲକଡାଉନ ଓ ସାମାଜିକ ଦୂରତା ଯୋଗୁଁ ସଂକ୍ରମଣକୁ ରୋକାଯାଇ ପାରିବ ବୋଲି ସରକାରଙ୍କ ପକ୍ଷରୁ ଘୋଷଣା କରାଯାଇଛି । ତା ସହିତ ଲକଡାଉନରେ ଫସି ରହିଥିବା ଅନ୍ୟ ରାଜ୍ୟର ଶ୍ରମିକ ମାନଙ୍କ ପାଇଁ ରାଜ୍ୟ ସରକାର ରହିବା ଖାଇବା ବ୍ୟବସ୍ଥା କରିଥିବା ବେଳେ ପ୍ରକୃତରେ ତାହା କାର୍ଯ୍ୟକାରୀ ହୋଇ ପାରିନାହିଁ । ଏପରି କିଛି ଦୃଶ୍ୟ ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲାରେ ।
ଲକଡାଉନ୍ ଯୋଗୁଁ ଖାଇବାକୁ ନ ପାଇ ଶ୍ରମିକ ମାନେ ଚାଲିଚାଲି ପଶ୍ଚିମବଙ୍ଗ ରାଜ୍ୟକୁ ଯାଉଥିବା ବେଳେ ବିଶୋଇ ବ୍ଲକ୍ ନିକଟରେ ସେମାନଙ୍କୁ ଉଦ୍ଧାର କରାଯାଇଛି । ପଶ୍ଚିମବଙ୍ଗରୁ ଆସି କରଞ୍ଜିଆ ଅଞ୍ଚଳର ବାଲାଜୀ କୋଲ୍ଡ ଷ୍ଟୋରରେ କାମ କରୁଥିବା ୨୦ ଜଣ ଶ୍ରମିକ ଲକଡାଉନ ଯୋଗୁଁ ଘରକୁ ଫେରି ପାରି ନଥିଲେ । ତେବେ ସେମାନଙ୍କୁ ନା କୋଲ୍ଡ ଷ୍ଟୋରର ମାଲିକ ସହଯୋଗର ହାତ ବଢ଼ାଇ ଥିଲେ ନା ସ୍ଥାନୀୟ ପ୍ରଶାସନ । ସରକାରଙ୍କ ଘୋଷଣାକୁ ଆଶା କରି ପଡି ରହିଥିଲେ ମାତ୍ର ସରକାରଙ୍କ ପକ୍ଷରୁ କିଛି ସହାୟତା ମିଳି ନଥିଲା ।
ଫଳରେ ଭୋକ ଉପାସରେ ମରିବା ଅପେକ୍ଷା ଘରକୁ କୌଣସି ଉପାୟରେ ଫେରିଯିବା ପାଇଁ କରଞ୍ଜିଆରୁ ଚାଲି ଚାଲି ପଶ୍ଚିମବଙ୍ଗ ଯାଉଥିବା ବେଳେ ବିଶୋଇ ଠାରେ ପୋଲିସ ଓ ସ୍ଥାନୀୟ ଲୋକଙ୍କ ନଜରକୁ ଆସିଥିଲା । ଏ ନେଇ ସ୍ଥାନୀୟ ତହସିଲଦାର ଓ ବିଡ଼ିଓଙ୍କୁ ଖବର ଦେବାରୁ ଖଡମ୍ବେଡା ନିକଟରେ ଥିବା ଏକ ବିଦ୍ୟାଳୟରେ ଶ୍ରମିକଙ୍କ ପାଇଁ ରହିବା ଓ ଖାଦ୍ୟପେୟର ବ୍ୟବସ୍ଥା କରାଯାଇଥିବା ସୂଚନା ମିଳିଛି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡ଼ା, ଇଟିଭି ଭାରତ
