ରାଇରଙ୍ଗପୁର: 6 ବର୍ଷ ପରେ ଏକ ନରହତ୍ୟା ମାମଲାରେ 2 ଅଭିଯୁକ୍ତକୁ ମିଳିଛି ଆଜୀବନ କାରାଦଣ୍ଡ । ଦଣ୍ଡାଦେଶ ଶୁଣାଇଛନ୍ତି ରାଇରଙ୍ଗପୁର ଅତିରିକ୍ତ ଜିଲ୍ଲା ଦୌରାଜଜ୍ ଅନୁପ ରଞ୍ଜନ ପଟ୍ଟନାୟକ । ମୁଖ୍ୟ ଅଭିଯୁକ୍ତ ମିଥିଲେଶ କୁମାର ଓ ତାଙ୍କ ସହଯୋଗୀ ପରମଜିତ ପ୍ରସାଦକୁ ଆଜୀବନ କାରାଦଣ୍ଡ ସହ ୨୦,୦୦୦ ଟଙ୍କା ଜୋରିମାନା ଶୁଣାଇଛନ୍ତି । ଏଥିସହ ଅନାଦେୟ 6 ମାସ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି ।
ସୂଚନାନୁଯାୟୀ, 30 ଜୁଲାଇ 2014 ମସିହାରେ ଝାଡ଼ଖଣ୍ଡ ରାଜ୍ୟର ଜାମସେଦପୁର ଅଞ୍ଚଳର କୋମଲ ମିଶ୍ର ନାମକ ଯୁବତୀଙ୍କୁ ମିଥିଲେଶ କୁମାର ଓ ତାଙ୍କ ସହଯୋଗୀ ପରମଜିତ ପ୍ରସାଦ ଯୋଜନାବଦ୍ଧ ଭାବେ ଜାମଶେଦପୁର ଅଞ୍ଚଳରୁ ଆଣି ରାସ୍ତାରେ ତଣ୍ଟି ଚିପି ହତ୍ୟା କରିଥିଲେ । ଏଥିସହ ଯୁବତୀଙ୍କ ମୃତଦେହକୁ ଏକ ଅଖାରେ ଭର୍ତ୍ତି କରି ଓଡ଼ିଶାର ତିରିଂ ଅଞ୍ଚଳରେ ଫୋଫାଡି ଦେଇଥିଲେ । କୋମଲଙ୍କ ବାପା ମା' ଝିଅର କୌଣସି ପତ୍ତା ନପାଇବାରୁ ଜାମସେଦପୁର ଅଞ୍ଚଳରେ ଥିବା ବିର୍ସାନଗର ଥାନାରେ ଏକ ଲିଖିତ ଅଭିଯୋଗ କରିଥିଲେ । ସେ ସମୟରେ ଓଡିଶାର ତିରିଂ ପୋଲିସ ଘଟଣାର ଛାନଭିନ କରି ଅଭିଯୁକ୍ତ 2 ଜଣକୁ ଗିରଫ କରି ରାଇରଙ୍ଗପୁର କୋର୍ଟ ଚାଲାଣ କରିଥିଲେ ।
ଶନିବାର ରାଇରଙ୍ଗପୁର ଅତିରିକ୍ତ ଜିଲ୍ଲା ଓ ଦୌରା ଜଜ୍ ଅନୁପ ରଞ୍ଜନ ପଟ୍ଟନାୟକ 21 ଜଣ ସାକ୍ଷୀମାନଙ୍କ ବୟାନକୁ ଭିତ୍ତି କରି 2ଜଣଙ୍କୁ ଆଜୀବନ କାରାଦଣ୍ଡ ସହିତ ୨୦,୦୦୦ ଟଙ୍କା ଜୋରିମାନା ଶୁଣାଇଛନ୍ତି । ଏହା ସହ ଅନାଦେୟ 6 ମାସ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି । ତେବେ କୋର୍ଟଙ୍କ ରାୟ ପ୍ରକାଶ ପାଇବା ପରେ ଉଭୟ ଆସାମୀକୁ ରାଇରଙ୍ଗପୁର ଉପକାରାଗାର ପଠାଇ ଦିଆଯାଇଛି । ଏହା ଏକ ପ୍ରେମଜନିତ ହତ୍ୟାକାଣ୍ଡ ହୋଇଥିବା ବେଳେ ଉଭୟ ଆସାମୀ ଜାମସେଦପୁର ଟେଲକୋ ଥାନା ଅଞ୍ଚଳର ବୋଲି ଜଣାପଡିଛି । ସରକାରଙ୍କ ପକ୍ଷରୁ ଏହି ମକଦ୍ଦମାକୁ ଅତିରିକ୍ତ ପିପି (ସରକାରୀ ଓକିଲ) ପଙ୍କଜ ଦାସ ପରିଚାଳନା କରୁଥିଲେ ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
