ରାଇରଙ୍ଗପୁର: ପୋଖରୀରେ ବୁଡି ମୟୂରଭଞ୍ଜର ଶୁକୃଳି ବ୍ଲକ ଉପାଧ୍ୟକ୍ଷଙ୍କ ନାବାଳକ ପୁଅର ମୃତ୍ୟୁ ଘଟିଛି । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଯାହାକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳି ଯାଇଛି।
ସୂଚନା ଅନୁସାରେ, ମୟୂରଭଞ୍ଜର ରରୁଆଁ ଥାନା ଅନ୍ତର୍ଗତ ମହିଳାଶୁଲି ଗାଁରେ ଥିବା ଗୁଡି ପୋଖରୀକୁ କୌଣସି କାରଣ ବଶତଃ ବ୍ଲକ ଉପାଧ୍ୟକ୍ଷା ପଦ୍ମିନୀ ଗିରିଙ୍କ ପୁତ୍ର ପ୍ରିନ୍ସ ଯାଇଥିଲେ । ସେଠାରେ ଗାଧେଇବା ପାଇଁ ହେଉ କିମ୍ବା ଗୋଡ଼ ଖସିଯିବା କାରଣରୁ ସେ ପାଣିରେ ପଡିଯାଇଥିଲେ । ସେ ପହଁରା ଜାଣି ନଥିବାରୁ ପାଣିରେ ବୁଡି ଯାଇଥିଲେ । କିଛି ସମୟ ପରେ ଘଟଣା ବିଷୟରେ ଜାଣିବା ପରେ ଗାଁ ଲୋକେ ଅଗ୍ନିଶମ ବିଭାଗ କର୍ମଚାରୀଙ୍କୁ ଖବର ଦେଇଥିଲେ ।
ଖବର ପାଇ ସଙ୍ଗେ ସଙ୍ଗେ ଶୁକୃଳି ଅଗ୍ନିଶମ ବିଭାଗ କର୍ମଚାରୀ ମାନେ ପହଞ୍ଚି ପୋଖରୀରୁ ନାବାଳକକୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏନେଇ ରରୁଆଁ ଥାନା ପୋଲିସ ଘଟଣାରେ ପହଞ୍ଚି ତଦନ୍ତ ଆରମ୍ଭ କରିବା ସହିତ ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ କରଞ୍ଜିଆ ଉପଖଣ୍ଡ ଚିକିତ୍ସାଳୟକୁ ପଠାଇଥିଲେ ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
