ମାଲକାନଗିରି: କାଲିମେଳା ବ୍ଲକରେ ଅଜଣା ରୋଗ ଆତଙ୍କ । ଗତ ୧୫ ଦିନ ମଧ୍ୟରେ ବ୍ଲକର ତାପନପାଲ୍ଲି ଗାଁର ୬ଜଣ ଶିଶୁ ପ୍ରାଣ ହରାଇଥିବା ଅଭିଯୋଗ ହୋଇଛି । 7 ଜଣ ଶିଶୁ ଗୁରୁତର ଭାବରେ କାଲିମେଳା ମେଡିକାଲରେ ଭର୍ତ୍ତି ହୋଇଥିବା ଖବର ମିଳିଛି ।
ଏବେସୁଦ୍ଧା ଗାଁର ଅନେକ ଶିଶୁ ଏହି ଅଜଣା ଜ୍ବରରେ ଆକ୍ରାନ୍ତ ହୋଇଛନ୍ତି । ଡାକ୍ତରୀ ଦଳ ଗାଁରେ ପହଞ୍ଚି ଶିଶୁଙ୍କ ସ୍ବାସ୍ଥ୍ୟ ପରୀକ୍ଷା କରିବା ସହ ସେଠାରେ ଚିକିତ୍ସା ଆରମ୍ଭ କରିଛନ୍ତି । ଏହାକୁ ନେଇ ଭୟଭୀତ ଅବସ୍ଥାରେ ରହିଛନ୍ତି ସ୍ଥାନୀୟ ଲୋକେ । ପୁଣି ଜାପାନୀ ଜ୍ଵର ଫେରିଥିବା ସେମାନେ ଆଶଙ୍କା କରୁଛନ୍ତି ।
ସବୁଠୁ ଚିନ୍ତାର ବିଷୟ ଯେ, ଡାକ୍ତରଖାନାରୁ ଚିକିତ୍ସିତ ହୋଇ ଫେରିବା ପରେ ପୁଣି ଜ୍ବରରେ ଆକ୍ରାନ୍ତ ହେଉଛନ୍ତି ଶିଶୁମାନେ । ଗତ ୧୫ ଦିନ ମଧ୍ୟରେ ତାପନପାଲ୍ଲି ଗାଁର ୬ ଜଣ ଶିଶୁ ପ୍ରାଣ ହରାଇବା ପରେ ଆଜି ଗାଁରେ ପହଞ୍ଚିଛି ଏକ ଡାକ୍ତରୀ ଦଳ । ଘର ଘର ବୁଲି ପିଲାଙ୍କ ରକ୍ତ ନମୁନା ସଂଗ୍ରହ କରିବା ସହ, ଜ୍ବର ଆକ୍ରାନ୍ତ ଶିଶୁଙ୍କ ସ୍ବାସ୍ଥ୍ୟ ପରୀକ୍ଷା ମଧ୍ୟ କରିଛନ୍ତି । ତେବେ ପିଲାଙ୍କୁ କି ପ୍ରକାର ଜ୍ବର ହେଉଛି ଡାକ୍ତରୀ ଟିମ ସ୍ପଷ୍ଟ କରିନାହିଁ । ତେବେ ଏହାର ଲକ୍ଷଣ ଭାବରେ ପିଲାଙ୍କୁ ପ୍ରଥମେ ଜ୍ବର ହେଉଛି ପରେ ଝାଡା ଓ ବାନ୍ତି ।
ସରକାର କେବଳ ଭାଷଣ ବାଜିରେ ନିଜ ଦାୟିତ୍ବ ସାରିଦେଇଥିବାବେଳେ, ଜିଲ୍ଲାରେ ଶିଶୁ ମୃତ୍ୟୁ ଥମିବାର ନା ଧରୁ ନାହିଁ । ସେପଟେ ଦୁଇବର୍ଷ ତଳେ ମାଲକାନଗିରି ଜିଲ୍ଲାରେ ଜାପାନୀ ଜ୍ବରର ଦୁଃଖ ମନରୁ ଲିଭିନି । ମାତ୍ର 2ମାସ ମଦ୍ୟରେ ଶତାଧିକ ଶିଶୁ ପ୍ରାଣ ହରାଇଥିଲେ । ଅନେକ ମାଆଙ୍କ କୋଳ ଶୂନ୍ୟ ହୋଇଯାଇଥିଲା । ଏହି ଆଦିବାସୀ ଅଞ୍ଚଳର ସଚେତନତା ଅଭାବରୁ ଅନେକ ଶିଶୁ ଅପପୁଷ୍ଟିର ଶୀକାର । ସେଥିପାଇଁ ଏହି ଅଞ୍ଚଳରେ ଏପରି ବିଭିନ୍ନ ଅଜଣା ରୋଗ କାୟା ବିସ୍ତାର କରୁଛି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
