ମାଲକାନଗିରି: ପୁଣି ଗୁରୁ-ଶିଷ୍ୟ ପରମ୍ପରାରେ ଲାଗିଲା କଳଙ୍କ । ଛାତ୍ରୀଙ୍କୁ ଅସଦାଚାରଣ କରି ଛେଚା ଖାଇଲେ ଶିକ୍ଷକ । ମାଲକାନଗିରି ଜିଲ୍ଲା କତାମାଟେରୁ ଆବାସିକ ବିଦ୍ୟାଳୟର ସହକାରୀ ଶିକ୍ଷକଙ୍କ ବିରୁଦ୍ଧରେ ଆସିଛି ଅଭିଯୋଗ । ଶିକ୍ଷକ ଅଶ୍ବିନୀ ଦେହୁରୀଙ୍କୁ ନିର୍ଧୁମ ମାଡ ମାରି ସ୍କୁଲ ଗେଟ୍ରେ ବାନ୍ଧି ରଖିଲେ ଗ୍ରାମବାସୀ ।
ସୂଚନାନୁସାରେ, ଗତ 23 ତାରିଖ ଦିନ ଅଶ୍ବିନୀ ଉକ୍ତ ବିଦ୍ୟାଳୟର ଜଣେ ଷଷ୍ଠ ଶ୍ରେଣୀର ଛାତ୍ରୀଙ୍କୁ ଖାତା ଦେଖା ବାହାନାରେ ନିଜ ବାସଭବନକୁ ଡାକି ନେଇଥିଲେ । ସେଠାରେ ଖାତା ଦେଖା ଆଳରେ ଛାତ୍ରୀଙ୍କ ସହ ଅସଦାଚାରଣ କରିଥିଲେ । ଏହା ପରେ ଗତ 25 ତାରିଖରେ ପୁନର୍ବାର ଅଶ୍ବିନୀ ଉକ୍ତ ଛାତ୍ରୀଙ୍କୁ ବିଦ୍ୟାଳୟର ପମ୍ପ ହାଉସ ଭିତରେ ଅସଦାଚରଣ କରିଥିଲେ । ଏନେଇ ନେଇ ପୀଡିତା ଛାତ୍ରୀ ଜଣକ ଅଭିଯୋଗ କରିବା ପରେ ଗ୍ରାମବାସୀମାନେ ଉତକ୍ଷିପ୍ତ ହୋଇ ଏଭଳି ଚରମ ପଦକ୍ଷେପ ନେଇଛନ୍ତି ।
ସେପଟେ ଗ୍ରାମବାସୀଙ୍କ ଅଭିଯୋଗକୁ ଅସ୍ବୀକାର କରିଛନ୍ତି ଖୋଦ୍ ଶିକ୍ଷକ । ଘଟଣା ସାର୍ବଜନୀନ ହେବା ପରେ ମାଲକାନଗିରି ଡିଡବ୍ଲ୍ୟୁଓ ଘଟଣାର ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
