ଭୁବନେଶ୍ବର: ଗୃହରେ ଶୂନ୍ୟକାଳରେ ଉଠିଲା ଯାତ୍ରା ମଞ୍ଚରେ ଅଶ୍ଳୀଳତା ପ୍ରସଙ୍ଗ । ଖୋଦ ଶାସକ ଦଳ ବିଧାୟକ ଉଠାଇଲେ ଏହି ପ୍ରସଙ୍ଗ । ଯାତ୍ରା ମଞ୍ଚରେ ଅଶ୍ଳୀଳତା ପ୍ରଦର୍ଶନ କଳା ସଂସ୍କୃତିକୁ କଳଙ୍କିତ କରୁଛି ବୋଲି କହିଛନ୍ତି, ବିଧାୟକ ବାବୁ ସିଂ । ସେଥିପାଇଁ ଏହାକୁ ରୋକିବା ଦିଗରେ ସରକାର ପଦକ୍ଷେପ ଗ୍ରହଣ କରନ୍ତୁ ବୋଲି ବାବୁ ଦାବି କରିଛନ୍ତି । ଚଳଚିତ୍ର ନିର୍ମାଣ କ୍ଷେତ୍ରରେ ଯେପରି ସେନସର ବୋର୍ଡ ରହିଛି, ଯାତ୍ରା କ୍ଷେତ୍ରରେ ମଧ୍ୟ ସେହିପରି ସେନସର ବୋର୍ଡ ଗଠନ କରିବାକୁ ବାବୁ ଦାବି କରିଛନ୍ତି ।
- ଯାତ୍ରା ସମାଜର ଦର୍ପଣ, ସଂସ୍କୃତି ବିରୋଧୀ ପ୍ରଦର୍ଶନକୁ ରୋକିବା ଜରୁରୀ:ବାବୁ
ବାବୁ କହିଛନ୍ତି, ଓଡ଼ିଶାର କଳା ସଂସ୍କୃତିକୁ ଯେଉଁଭଳି ଅପଭ୍ରଂଶ କରାଯାଉଛି, ତାର ବାସ୍ତବ ଚିତ୍ର ଯାତ୍ରା ପାର୍ଟିଗୁଡିକର ପଦର୍ଶନରୁ ଜଣାପଡୁଛି । ବାଚସ୍ପତି ଏହି ଅସଙ୍ଗତିକୁ ଦୂର କରିବା ପାଇଁ ଏକ ଏଭଳି ନିଷ୍ପତ୍ତି ନିଅନ୍ତୁ । ଯାହା ମାଇଲଖୁଣ୍ଟ ହୋଇ ରହିବ । ଯାତ୍ରା ହେଉଛି ସମାଜର ଦର୍ପଣ, ଆମେ ଯାତ୍ରା ଦେଖୁ ତାର ପରବର୍ତ୍ତୀ ଅବସ୍ଥାରେ ଆମ ଭିତରେ ପ୍ରତିଫଳନ ହୁଏ । ଆମ ସଂସ୍କୃତିକୁ ନଷ୍ଟ କରିବାକୁ ଯିଏ ଚାହେଁ, ତାକୁ ଆମେ ବିରୋଧ କରିବୁ । ଲୋକଙ୍କୁ ମନୋରଞ୍ଜନ କରିବା ଆଳରେ ନଗ୍ନ ନୃତ୍ୟ ସଂସ୍କୃତି ବିରୋଧୀ । ଏହା ବନ୍ଦ ହେବା ଦରକାର । ସେଥିପାଇଁ ଗୃହର ଦୃଷ୍ଟି ଆକର୍ଷଣ କରିଛୁ । ଯାତ୍ରା ମାଲିକମାନଙ୍କ ପାଇଁ ସରକାର ସେନ୍ସର ବୋର୍ଡ଼ର ବ୍ୟବସ୍ଥା କରନ୍ତୁ ।’’
ଏହା ମଧ୍ୟ ପଢନ୍ତୁ:- ବାର୍ ପରେ ଯାତ୍ରା: ଯାତ୍ରା ପେଣ୍ଡାଲରେ ଅଶ୍ଳୀଳତାକୁ ନା, ଖୁବ ଶୀଘ୍ର ଆସୁଛି ଗାଇଡଲାଇନ୍
ପୂର୍ବରୁ ମଧ୍ୟ ସଂସ୍କୃତି ମନ୍ତ୍ରୀ ସୂର୍ଯ୍ୟବଂଶୀ ସୂରଜ ଏହି ପ୍ରସଙ୍ଗରେ ଏକ ଗାଇଡଲାଇନ ଆସିବା ନେଇ ସଙ୍କେତ ଦେଇସାରିଛନ୍ତି । ମଞ୍ଚରେ କେବେ ହେଲେ ଅଶ୍ଳୀଳତା କିମ୍ବା ନଗ୍ନତା ଗ୍ରହଣୀୟ ନୁହେଁ । ଖୁବଶୀଘ୍ର ଆସିବାକୁ ଯାଉଛି ଏହା ସମ୍ପର୍କିତ ଏକ ଗାଇଡଲାଇନ୍ । ସରକାର ଏହି ପ୍ରସଙ୍ଗରେ ଚିନ୍ତା କରୁଛନ୍ତି ଓ ଖୁବଶୀଘ୍ର ଏକ ନିର୍ଦ୍ଦେଶାବଳୀ ଆଣିବାକୁ ଯାଉଛନ୍ତି । ଏହି ନିର୍ଦ୍ଦେଶାବଳୀ ଅନୁସାରେ ହିଁ ଯାତ୍ରା କମିଟିମାନେ ଆୟୋଜନ କରିବେ ବୋଲି ଗତ କିଛି ମାସ ତଳେ ଭାଷା-ସାହିତ୍ୟ ଓ ସଂସ୍କୃତି ମନ୍ତ୍ରୀ ସୂର୍ଯ୍ୟବଂଶୀ ସୂରଜ କହିଥିଲେ ।
- ଅଶ୍ଳୀଳତା ପାଇଁ ମୁହଁ ଫେରାଇଲେଣି ମଞ୍ଚ କଳାପ୍ରେମୀ !
ଯାତ୍ରା ରାଜ୍ୟର ଗ୍ରାମାଞ୍ଚଳର ଏକ ପୁରାତନ ମନୋରଞ୍ଜନର ଲୋକପ୍ରିୟ ମାଧ୍ୟମ । ମାତ୍ର ଅଶ୍ଳୀଳ ପ୍ରଦର୍ଶନ କାରଣରୁ ବର୍ତ୍ତମାନ ସ୍ଥିତିରେ ସପରିବାର ଯାତ୍ରା ଦେଖିବା ସମ୍ଭବ ହେଉନାହିଁ । ବରିଷ୍ଠ ମଞ୍ଚ କଳାପ୍ରେମୀ ଦର୍ଶକ ବର୍ଗ ମଧ୍ୟ ଏହି କାରଣରୁ ଯାତ୍ରା ଦେଖିବା ବନ୍ଦ କରିସାରିଲେଣି । ଏବେ ସରକାର କେଉଁ ପ୍ରକାରର ନିର୍ଦ୍ଦାଶାବଳୀ ଆଣୁଛନ୍ତି ଓ ଫଳରେ ଅଶ୍ଳୀଳତାରେ କେତେ ରୋକ ଲାଗିବ, ତାହା ଉପରେ ସମସ୍ତଙ୍କ ନଜର ।
ଇଟିଭି ଭାରତ, ଭୁବନେଶ୍ବର
