ମାଲକାନଗିରି: ବଢୁଛି ବାଲିମେଳା ଜଳ ଭଣ୍ଡାର ଜଳସ୍ତର । ବିପଦରେ ଚିତ୍ରକୋଣ୍ଡାର ସ୍ବାଭିମାନ ଅଞ୍ଚଳ । ବିଚ୍ଛିନ୍ନାଞ୍ଚଳର ଏକମାତ୍ର ଡାକ୍ତରଖାନା ଭିତରେ ପାଣି ପଶି ଯାଇଥିବା ବେଳେ ବୁଡି ଯାଇଛି ଶହ ଶହ ଲୋକଙ୍କ ଫସଲ । ଡ୍ୟାମରୁ ପାଣି ଛାଡିବା ଲାଗି ଲୋକେ ଦାବି କରୁଥିବା ବେଳେ ବିଭାଗ କିନ୍ତୁ ସାଜିଛି ନୀରବଦ୍ରଷ୍ଟା । ଏନେଇ ଗ୍ରାଉଣ୍ଡ ଜିରୋରେ ବାସ୍ତବ ସ୍ଥିତି ପରଖିଥିଲା ଇଟିଭି ଭାରତ ଟିମ୍ ।
ସ୍ବାଭିମାନ ଅଞ୍ଚଳର ଅସଜଡା ଚିତ୍ର । ଥରେ ନଜର ପକାନ୍ତୁ ପାଣିରେ କିଭଳି ଉବୁଟୁବୁ ହେଉଛି ଜାନବାଇ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର । ରୋଗୀଙ୍କ ଖଟିଆ ଠାରୁ ଆରମ୍ଭ କରି ଡାକ୍ତରଙ୍କ ଚେୟାର ଟେବୁଲ ପର୍ଯ୍ୟନ୍ତ ସବୁଠି ଲହଡି ଭାଙ୍ଗୁଛି ପାଣି । ସ୍ବାଭିମାନ ଅଞ୍ଚଳର ଏକମାତ୍ର ସାହାରା ପାଲିଟିଥିବା ଏହି ସ୍ବାସ୍ଥ୍ୟକେନ୍ଦ୍ର ଏବେ ନିଜେ ଖୋଜୁଛି ସାହାରା । ଗତ ସପ୍ତାହ ଧରି ବାଲିମେଳା ଜଳ ଭଣ୍ଡାରରେ ଜଳସ୍ତର ବୃଦ୍ଧି ପାଇବାରୁ ଏଭଳି ପରିସ୍ଥିତି ଉପୁଜୁଛି ।
କେବଳ ସ୍ବାସ୍ଥକେନ୍ଦ୍ର ନୁହେଁ ବିଛିନ୍ନାଞ୍ଚଳର ଶହ ଶହ ଏକର ଫସଲରେ ମଧ୍ୟ ମାଡି ଯାଇଛି ଡ୍ୟାମ ପାଣି । ଆଖି ଆଗରେ ଏସବୁକୁ ନଷ୍ଟ ହେଉଥିବା ଦେଖି ଅଥୟ ହୋଇପଡିଛନ୍ତି ଲୋକେ । ଗତ ସପ୍ତାହ ଧରି ଲୋକେ ଡ୍ୟାମରୁ ପାଣି ଛାଡିବା ପାଇଁ ଦାବି କରି ଆସୁଥିଲେ ସୁଦ୍ଧା ପ୍ରଶାସନ ଏପର୍ଯ୍ୟନ୍ତ କର୍ଣ୍ଣପାତ କରିନାହିଁ । ଏନେଇ ଜିଲ୍ଲା ଜରୁରୀକାଳୀନ ଅଧିକାରୀଙ୍କୁ ପଚରା ଯିବାରୁ ଆବଶ୍ୟକ ସ୍ଥଳେ ଲୋକଙ୍କୁ ସମସ୍ତ ସାହାଯ୍ୟ ସହଯୋଗ ଯୋଗାଇ ଦିଆଯିବ ବୋଲି ସେ କହିଛନ୍ତି ।
ବାଲିମେଳା ଡ୍ୟାମ ଖୁସିର କାରଣ ହେବା ବଦଳରେ ଲୋକଙ୍କ ପାଇଁ ଦୁଃଖର କାରଣ ପାଲଟିଛି । ତେବେ ଅଞ୍ଚଳବାସୀ କେବେ ମୁକୁଳିବେ ପାଣି ସମସ୍ୟାରୁ ତାହା ଦେଖିବାକୁ ବାକି ରହିଲା ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
