ମାଲକାନଗିରି: ଶିକ୍ଷାର ପ୍ରଚାର ପ୍ରସାର ପାଇଁ ସରକାରୀ ସ୍ତରରେ କରାଯାଉଛି ଅନେକ ଯୋଜନା । ଆଉ ଏଥିପାଇଁ ରାଜକୋଷରୁ ଖର୍ଚ୍ଚ ହେଉଛି ବେଶ ମୋଟା ଅଙ୍କର ଟଙ୍କା । ସମସ୍ତଙ୍କ ନିକଟରେ ଶିକ୍ଷାକୁ ପହଞ୍ଚାଇବା ପାଇଁ ସରକାରଙ୍କ ପକ୍ଷରୁ କରାଯାଉଛି ଅନେକ ପ୍ରକାରର ବ୍ୟବସ୍ଥା । ମାତ୍ର ଏହାର ସୁଫଳ ଆଦିବାସୀ ଅଧ୍ୟୁଷିତ ମାଲକାନଗିରି ଜିଲ୍ଲାରେ ଉପଲବ୍ଧ ହେଉନଥିବା ଜଣାପଡିଛି । ଏଠାକାର ଛାତ୍ରଛାତ୍ରୀଙ୍କ ପାଠ ପଢାରେ ବାଧକ ସାଜିଛି ଜାତିଗତ ପ୍ରମାଣପତ୍ର ।
ଏଭଳି ସମସ୍ୟା ଦେଖିବାକୁ ମିଳିଛି ମାଲକାନଗିରିର ଦୋରାଗୁଡ଼ା ଗ୍ରାମରେ । ଏହି ଗାଁରେ ପ୍ରାୟ 40ରୁ ଅଧିକ ଆଦିବାସୀ ପରିବାର ବସବାସ କରିଥାନ୍ତି । ସ୍ଥାନୀୟ ଗ୍ରାମବାସୀ ଆଦିବାସୀ ହୋଇଥିବାରୁ ସେମାନଙ୍କୁ ସରକାରୀ ସ୍ତରରେ ଅନେକ ସୁବିଧା ସୁଯୋଗ ମିଳିଥାଏ। ମାତ୍ର ବ୍ୟତିକ୍ରମ ଏହା ଯେ ଶିକ୍ଷାରୁ ବଞ୍ଚିତ ହେବାକୁ ପଡୁଛି ସେମାନଙ୍କୁ। ଜାତିଗତ ପ୍ରମାଣପତ୍ର ନ ମିଳିବାରୁ ଏଭଳି ସମସ୍ୟାର ସାମ୍ନା କରିବାକୁ ପଡୁଛି। ଯାହା ଫଳରେ ଗାଁର ପିଲାଏ ପାଠପଢାରୁ ବଞ୍ଚିତ ହେଉଛନ୍ତି।
ଏନେଇ ଗ୍ରାମବାସୀ ଏବଂ ଛାତ୍ରଛାତ୍ରୀ ଅନେକ ସରକାରୀ କାର୍ଯ୍ୟାଳୟକୁ ଦୌଡି ଦୌଡି ନୟାନ୍ତ ହେବା ପରେ ମଧ୍ୟ କୌଣସି ସୁଫଳ ମିଳିନାହିଁ। ଜାତିଗତ ପ୍ରମାଣପତ୍ର ଅଭାବରୁ ଶିକ୍ଷାରୁ ବଞ୍ଚିତ ହୋଇ ରହିଥିବା ବହୁ ଛାତ୍ରଛାତ୍ରୀ ବର୍ତ୍ତମାନ ଦିନମଜୁରିଆ ଭାବେ କାମ କରୁଛନ୍ତି । ଯେଉଁମାନଙ୍କର ପାଠ ପଢା ବନ୍ଦ ହେବାକୁ ଯାଉଛି ସେମାନେ ପ୍ରଶାସନର ଉଦାସୀନତା ପ୍ରତି ଅସନ୍ତୁଷ୍ଟ ମାଓବାଦୀ ସଙ୍ଗଠନରେ ସାମିଲ ହେବେ ବୋଲି ଜଣାଇ ଦେଇଛନ୍ତି ।
ଏହି ସମସ୍ୟା ସମ୍ପର୍କରେ ମାଲକାନଗିରି ତହସିଲଦାରଙ୍କ ଦୃଷ୍ଟି ଆକର୍ଷଣ କରାଯାଇଥିଲା । ଏ ଖବର ପାଇବା ପରେ ସେ ତୁରନ୍ତ ଦୋରାଗୁଡା ଗ୍ରାମକୁ ଯାଇ ତଦନ୍ତ କରିବା ପାଇଁ ପ୍ରତିଶୃତି ଦେଇଛନ୍ତି । ଜିଲ୍ଲା ପ୍ରଶାସନ ଏହାକୁ ଗମ୍ଭୀରତାର ସହ ନେଇଥିବା ବେଳେ ଜାତିଗତ ପ୍ରମାଣପତ୍ର ଅଭାବରୁ କେହି ବି ଶିକ୍ଷାରୁ ବଞ୍ଚିତ ହେବେ ନାହି ବୋଲି ତହସିଲଦାର ଜଣାଇଛନ୍ତି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
