ମାଲକାନଗିରି: ରୋଷେଇ ଘରୁ ଉଦ୍ଧାର ହେଲା 8 ଫୁଟିଆ ଅଜଗର । ମାଲକାନଗିରି ସଦର ମହକୁମାର ସୁବାଷ ବୋଷ ଛକ ନିକଟରେ ଜଣେ ବ୍ୟକ୍ତିଙ୍କ ରୋଷେଇ ଘରୁ ଏକ 8 ଫୁଟିଆ ଅଜଗର ସାପ ଉଦ୍ଧାର ହୋଇଛି ।
ସୂଚନା ଅନୁଯାୟୀ, ଗତ ବୁଧବାର ରାତିରେ ପରିବାର ଲୋକ ଶୋଇଥିବା ସମୟରେ ରୋଷେଇ ଘରୁ ଏକ ଶବ୍ଦ ହୋଇଥିଲା । ଶବ୍ଦ ଶୁଣି ପରିବାର ଲୋକେ ଉଠି ପଡିଥିଲେ । ରୋଷେଇ ଘରେ ଯାଇ ଦେଖିଲା ବେଳକୁ ଏକ ବଡ ଅଜଗର ରୋଷେଇ ଘରେ ପଶିଥିବା ପରିବାର ଲୋକ ଦେଖିବାକୁ ପାଇଥିଲେ ।
ଏହାପରେ ତୁରନ୍ତ ସେମାନେ ସ୍ନେକ ହେଲ୍ପ ଲାଇନକୁ କଲ କରିଥିଲେ । ଖବର ପାଇ ସ୍ନେକ ହେଲ୍ପ ଲାଇନ ସଦସ୍ୟ ସତ୍ୟଜିତ ଗୌଡ ଘଟଣାସ୍ଥଳରେ ପହଞ୍ଚି ସାପଟିକୁ ଉଦ୍ଧାର କରିଥିଲେ। ଏପଟେ ସାପଟିକୁ ଉଦ୍ଧାର କରିବା ପରେ ସୁରକ୍ଷିତ ଭାବେ ଜଙ୍ଗଲରେ ଛଡାଯାଇଥିବା ଜଣାପଡ଼ିଛି ।
ମାଲକାନଗିରିରୁ ଦେବଦତ୍ତ ବେହେରା, ଇଟିଭି ଭାରତ
