ମାଲକାନଗିରି: ନିମ୍ନ ମାନର ରାସ୍ତାକାମକୁ ବିରୋଧ କରି ମରାମତି କାମ ବନ୍ଦ କରିଛନ୍ତି ଉତ୍ୟକ୍ତ ଗ୍ରାମବାସୀ । ଏଭଳି ଘଟଣା ଦେଖିବାକୁ ମିଳିଛି ମାଲକାନଗିରି ଜିଲ୍ଲା କାଲିମେଳା ବ୍ଲକ ଅନ୍ତର୍ଗତ ଏମ.ଭି 129 ଗ୍ରାମରେ ।
ଏମ.ଭି 129 ଗ୍ରାମବାସୀଙ୍କ କହିବା ଅନୁସାରେ ଗ୍ରାମ ମଧ୍ୟରେ ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନାରେ 1କି.ମି ଦୂରତାର ପିଚୁ ରାସ୍ତା, ସିସି ରାସ୍ତା ଓ ଗାର୍ଡ ୱାଲ ପାଇଁ 42ଲକ୍ଷ 77ହଜାର ଟଙ୍କା ଆସିଥିଲା । ଏହାସହ ରାସ୍ତାର 5 ବର୍ଷ ରକ୍ଷଣାବେକ୍ଷଣ ପାଇଁ 3 ଲକ୍ଷ 55 ହଜାର ଟଙ୍କା ଆସିଥିବା ବେଳେ 2018 ମସିହାରେ କାମ ସମ୍ପୂର୍ଣ୍ଣ ହେବା ଧାର୍ଯ୍ୟ ହୋଇଥିଲା । କିନ୍ତୁ ଉକ୍ତ କାମ କରୁଥିବା ଠିକାଦାର ଏହି କାମଟିକୁ ଗୋଟିଏ ବର୍ଷ ବିଳମ୍ବ କରି 2019 ମସିହାରେ କରି ଥିବା ଜଣାପଡିଛି ।
ପାଞ୍ଚ ବର୍ଷର ରକ୍ଷଣାବେକ୍ଷଣ ସମୟ ସୀମା ମଧ୍ୟରୁ 1 ବର୍ଷ ବାଦ ପଡିଥିବା କହିଛନ୍ତି ଗ୍ରାମବାସୀ । 2019 ମସିହାରେ କାମ ହୋଇଥିବା ଏହି ରାସ୍ତାର 6 ମାସ ନପୁରୁଣୁ ଚିହ୍ନ ବର୍ଣ୍ଣ ନଥିବା ଦେଖା ଯାଇଛି । ରାସ୍ତାର କିଛି ସ୍ଥାନରେ ଖାଲ ହୋଇ ଯାଇଛି ତ କେଉଁଠି ମାଟି ଦେଖା ଯାଉଛି । ଏହାର ଅଭିଯୋଗ ପରେ ଉକ୍ତ ରାସ୍ତାରେ ଠିକାଦାର ଦୁଇ ତିନିଟି ଶ୍ରମିକ ଆଣି ରାସ୍ତା ମରାମତି ନାମରେ କିଛି ବଜୁରୀ, ପିଚୁ ଓ ଡଷ୍ଟ ଆଣି ଢାଳିଦେଇଥିଲା ।
ତେବେ ଏହାକୁ ଗ୍ରାମବାସୀ ବିରୋଧ କରିବାରୁ କାମଟି ବନ୍ଦ ରହିଥିବା ଜଣାପଡିଛି। ସରକାରୀ ଯନ୍ତ୍ରୀ ଓ ଠିକାଦାରଙ୍କ ମଧୁଚନ୍ଦ୍ରିକା ରହିଥିବା କହିଛନ୍ତି ଗ୍ରାମବାସୀ । ଗ୍ରାମ ମୁଖିଆ ନିର୍ମଲ ମଣ୍ଡଲଙ୍କ ନେତୃତ୍ବରେ ଗ୍ରାମବାସୀ ଅଭିଯୋଗ କରି ରାସ୍ତା କାମର ଅନିୟମିତତା ଯାଞ୍ଚ ପାଇଁ ସରକାରଙ୍କ ପାଖରେ ଦାବି କରିଛନ୍ତି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
