ମାଲକାନଗିରି: ଏନଆରସି ଡାଟାକୁ ନେଇ ସମଗ୍ର ଦେଶରେ ରହୁଥିବା ବାଂଲାଦେଶୀଙ୍କ ମୁଣ୍ଡରେ ପଡିଛି ଚଡକ । ଆସାମ ପରେ ଏବେ କେନ୍ଦ୍ର ସରକାରଙ୍କ ଆଖି ଓଡିଶା ଉପରେ ରହିଥିବା ବେଳେ ମାଲକାନଗିରି ଜିଲ୍ଲାର ବଙ୍ଗୀୟ ଶରଣାର୍ଥୀଙ୍କ ମନରେ ଭୟର ବାତାବରଣ । ସେପଟେ ଏନଆରସି ରିପୋର୍ଟ ପରେ ‘ଯିଏ ଭାରତର ନାଗରିକ ନୁହେଁ ସେ ତୁରନ୍ତ ଦେଶ ଛାଡି ଚାଲିଯାଅ’ ବୋଲି କହିଛନ୍ତି କେନ୍ଦ୍ର ସରକାର ।
ଏହାକୁ ନେଇ ରାଜ୍ୟରେ ବସବାସ କରୁଥିବା ବାଂଲାଦେଶୀଙ୍କ ମୁଣ୍ଡ ଉପରେ ଚଡକ ପଡିଛି । ତେବେ କେନ୍ଦ୍ର ସରକାରଙ୍କ ନିଷ୍ପତ୍ତି ପରେ ଗ୍ରାଉଣ୍ଡ ଜିରୋରେ ବାସ୍ତବତା ଜାଣିବା ପାଇଁ ମାଲକାନଗିରି ଜିଲ୍ଲାର ଅନେକ ବଙ୍ଗୀୟ ଶରଣାର୍ଥୀଙ୍କ ଗାଁକୁ ଯାଇ ପହଞ୍ଚିଥିଲା ‘ଇଟିଭି ଭାରତ’ ଟିମ୍ । ତଥ୍ୟ ଅନୁଯାୟୀ 1961 ମସିହାରେ ବାଂଲାଦେଶରେ ଦଙ୍ଗା ହୋଇଥିବା ସମୟରେ ଲକ୍ଷ ଲକ୍ଷ ଶରଣାର୍ଥୀ ନିଜର ଭିଟା ମାଟି ଛାଡି ଭାରତକୁ ଚାଲି ଆସିଥିଲେ ।
ଏମାନଙ୍କୁ ଦେଶର ବିଭିନ୍ନ ରାଜ୍ୟରେ ଥଇଥାନ କରାଯାଇଥିବା ବେଳେ ମାଲକାନଗିରି ଜିଲ୍ଲାରେ ମଧ୍ୟ ପୁନର୍ବସତି ପାଇଥିଲେ ଅନେକ ବଙ୍ଗୀୟ ଶରଣାର୍ଥୀ । ଜିଲ୍ଲାରେ 215ଟି ଏମ.ଭି ଓ ଏମ.ପି.ଭି ଗ୍ରାମରେ ଏମାନଙ୍କୁ ଥାଇଥାନ କରାଯାଇଥିଲା । ପରିବାର ପିଛା 6 ଏକର ଚାଷ ଜମି ଓ 6 ହଜାର ଟଙ୍କାର ଆର୍ଥିକ ସହାୟତା ଯୋଗାଇଥିଲେ କେନ୍ଦ୍ର ସରକାର । ଏହାରି ଭିତରେ ଦୀର୍ଘ 6 ଦଶନ୍ଧି ବିତି ଯାଇଛି । ଆଉ ସେସମୟର ବଙ୍ଗୀୟ ଶରଣାର୍ଥୀ ଏବେ ଓଡିଶାର ଅର୍ଥନୀତି, ସାମାଜିକ ଓ ରାଜନୀତି କ୍ଷେତ୍ରରେ ଅଂଶୀଦାର ହୋଇଛନ୍ତି ।
ପୂର୍ବତନ ବିଧାୟକ ନଦିଆବାସି ବିଶ୍ଵାସ ଓ ନିମାଇଁ ସରକାରଙ୍କଠାରୁ ଆରମ୍ଭ କରି କ୍ୟାବିନେଟ ମନ୍ତ୍ରୀ ଅରବିନ୍ଦ ଢାଲିଙ୍କ ପର୍ଯ୍ୟନ୍ତ ସମସ୍ତେ ହେଉଛନ୍ତି ବଙ୍ଗୀୟ ଶରଣାର୍ଥୀ । ମାଲକାନଗିରି ଜିଲ୍ଲାର 215ଟି ଗାଁର ପ୍ରାୟ 2 ଲକ୍ଷ ବଙ୍ଗୀୟ ଶରଣାର୍ଥୀ ଏବେ ସେଠାକାର ସ୍ଥାୟୀ ବାସିନ୍ଦା । ମତଦାନଠାରୁ ଆରମ୍ଭ କରି ସରକାରୀ ଚାକିରି ଓ ରାଜନୀତିରେ ଅଂଶଗ୍ରହଣ କରିବା ପରି ଅନେକ ଗୁରତ୍ଵପୂର୍ଣ୍ଣ ଭୂମିକା ନିଭାଉଛନ୍ତି ବଙ୍ଗୀୟ ଶରଣାର୍ଥୀ ।
ତେବେ 60ବର୍ଷ ଧରି ଓଡିଶାରେ ରହିବା ପରେ ନିଜକୁ ଆଉ ବଙ୍ଗୀୟ ବୋଲି ଭାବୁ ନାହାନ୍ତି ମାଲକାନଗିରି ଜିଲ୍ଲାର ବଙ୍ଗୀୟ ଲୋକେ । ନିଜକୁ ଓଡିଆ ବୋଲି ଭାବୁଥିବା ବଙ୍ଗୀୟ ଲୋକେ ଚାଷବାସ କରିବା ସହ ଜିଲ୍ଲାରେ ଅନେକ ଛୋଟ ବଡ ଚାକିରି କରି ନିଜ ପରିବାର ଚଳାଉଛନ୍ତି । ହେଲେ କେନ୍ଦ୍ର ସରକାରଙ୍କ ଏନଆରସି ରିପୋର୍ଟ ପରେ ପ୍ରଶାସନ ତନାଘନା କରୁଥିବାରୁ ଚିନ୍ତାରେ ମାଲକାନଗିରି ଜିଲ୍ଲାର ବଙ୍ଗୀୟ ଲୋକେ ।
ହେଲେ ସେମାନଙ୍କ ସମସ୍ତ ପ୍ରମାଣପତ୍ର ଠିକ ରହିଥିବା କହିଛନ୍ତି ବଙ୍ଗୀୟ ଲୋକେ । ତେବେ କେନ୍ଦ୍ର ସରକାରଙ୍କ ନିର୍ଦ୍ଦେଶ ପରେ ଜିଲ୍ଲାରେ ବେଆଇନ ଭାବେ ରହୁଥିବା ବଙ୍ଗୀୟମାନଙ୍କୁ ଚିହ୍ନଟ କରିବା ପାଇଁ ତହସିଲଦାରମାନଙ୍କୁ ନିର୍ଦ୍ଦେଶ ଦେଇଛି ଜିଲ୍ଲା ପ୍ରଶାସନ ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
