ମାଲକାନଗିରି: ଜୁଲାଇ ୨୮ ତାରିଖ(ରବିବାର) ଠାରୁ ଶହୀଦ ସପ୍ତାହ ପାଳନ କରୁଛନ୍ତି ମାଓବାଦୀ । ଅଗଷ୍ଟ ୩ ତାରିଖ ଯାଏଁ ଶହୀଦ ସପ୍ତାହ ପାଳନ କରିବେ ମାଓବାଦୀ । ଏଥି ପାଇଁ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି । ଶହୀଦ ସପ୍ତାହରେ ହିଂସା ତଥା ଜନସାଧାରଣଙ୍କୁ ସୁରକ୍ଷାକୁ ଆଖି ଆଗରେ ରଖି ସରକାରୀ ଓ ଘରୋଇ ବସ୍ ଚଳାଚଳକୁ ସମ୍ପୂର୍ଣ୍ଣ ବନ୍ଦ ରଖାଯାଇଛି । ବିଭିନ୍ନ ସ୍ଥାନରେ ସୁରକ୍ଷାବାହିନୀଙ୍କ କଡା ପ୍ରହରା ଜାରି ରହିଛି ।
ବିଗତ ଦିନ ଗୁଡିକରେ ପୋଲିସ ଗୁଳିରେ ପ୍ରାଣ ହରାଇଥିବା ସାଥିଙ୍କୁ ମନେ ପକାଇ ଲାଲବାହିନୀ ଏହି ଶହୀଦ ସପ୍ତାହ ପାଳନ କରନ୍ତି । ଏଥିପାଇଁ ନକ୍ସଲ ମାନେ ଜିଲ୍ଲାର ବିଭିନ୍ନ ଅଞ୍ଚଳରେ ପୋଷ୍ଟର ଲଗାଇ ସାଧାରଣ ଲୋକଙ୍କୁ ସେମାନଙ୍କ ଶହୀଦ ସପ୍ତାହରେ ସାମିଲ ହେବା ଲାଗି ଆହ୍ବାନ କରିଛନ୍ତି । ଶହୀଦ ସପ୍ତାହକୁ ନେଇ ମାଓବାଦୀଙ୍କ ଡାକରା ସାଧାରଣରେ ଭୟ ସଞ୍ଚାର କରିଛି ।
ବସ ଚଳାଚଳ ବନ୍ଦ ଫଳରେ ପ୍ରଭାବିତ ହୋଇଛନ୍ତି ଅନେକ ଯାତ୍ରୀ । ଏହାସହ ନକ୍ସଲ ପ୍ରବଣ ଅଞ୍ଚଳମାନଙ୍କରେ ବିଏସଏଫ ଓ ଏସଓଜି ଯବାନଙ୍କ ପକ୍ଷରୁ କୁମ୍ବିଂ ଅପରେସନ ଜୋରଦାର କରାଯାଇଛି । ସହରର ସମସ୍ତ ମୁଖ୍ୟ ରାସ୍ତାରେ ପୋଲିସ ପକ୍ଷରୁ ପାଟ୍ରୋଲିଂ ଜାରି ରହିଛି । କୌଣସି ପ୍ରକାର ଅପ୍ରୀତିକର ଘଟଣାକୁ ଏଡାଇବା ପାଇଁ ଗୁଇନ୍ଦା ବିଭାଗ ତତ୍ପର ରହିଥିବା ଜଣାପଡ଼ିଛି । ସ୍ଵାଭିମାନ ଅଞ୍ଚଳର ମାଓବାଦୀଙ୍କୁ ହିଂସାର ରାସ୍ତାଛାଡି ସମାଜର ମୁଖ୍ୟ ସ୍ରୋତରେ ସାମିଲ ହେବା ଲାଗି ମାଲକାନଗିରି ଏସ୍ପି ଆହ୍ବାନ କରିଛନ୍ତି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
