ମାଲକାନଗିରି/ ରାଇରଙ୍ଗପୁର: ନବଦିନାତ୍ମକ ଯାତ୍ରା ଶେଷ କରି ଜନ୍ମବେଦୀରୁ ସିଂହଦ୍ବାରକୁ ଫେରି ଆସିଛନ୍ତି ମହାପ୍ରଭୁ । ନିଜ ଭାଇ ଭଉଣୀଙ୍କ ସହ କାଳିଆ ସାଆନ୍ତ ବାହୁଡିଛନ୍ତି । ଏଥିପାଇଁ ଉତ୍ସବ ମୁଖର ହୋଇଉଠିଛି ସମଗ୍ର ରାଜ୍ୟ । ସବୁଠି ଆନନ୍ଦ ଉଲ୍ଲାସ । ଏପଟେ ମହାପ୍ରଭୁଙ୍କ ବିନା ଖାଁ ଖାଁ ହୋଇପଡିଥିବା ସିଂହଦ୍ବାର ପୁଣି ଥରେ ଲୋକାରଣ୍ୟ ହୋଇଉଠିଛି । ନିଜ ମହାପ୍ରଭୁଙ୍କୁ ଅପେକ୍ଷା କରି ରହିଥିବା ଭକ୍ତଙ୍କ ଆତ୍ମାକୁ ଶାନ୍ତି ମିଳିଛି । ସମସ୍ତେ ଆତ୍ମ ବିଭୋର ହୋଇଉଠିଛନ୍ତି । ବାହୁଡା ଯାତ୍ରା ପାଇଁ ସବୁଠି ଖୁସିର ମାହୋଲ । ତେବେ ନଜର ପକାନ୍ତୁ ରାଜ୍ୟର କେଉଁଠି ? କିପରି ? ପାଳିତ ହୋଇଛି ବାହୁଡା ଯାତ୍ରା ।
ଲାଲଗଡରେ ବଡ ଧୁମଧାମରେ ପାଳିତ ହୋଇଛି ବାହୁଡା ଯାତ୍ରା । ନବଦିନାତ୍ମକ ଯାତ୍ରା ଶେଷ କରି ଫେରିଛନ୍ତି କାଳିଆ ଠାକୁର । ନୀତି ଅନୁସାରେ ପ୍ରଥମେ, ତିନି ରଥ ଉପରେ ଶ୍ରୀ ବିଗ୍ରହମାନଙ୍କ ପହଣ୍ଡି ବିଜେ ହୋଇ ରଥାରୂଢ ହେବାପରେ ବିଗ୍ରହମାନଙ୍କୁ ମଇଲମ ଓ ମାଳଫୁଲ, ଲାଗି ହୋଇଥିଲା ।
ଏହାପରେ ମାଲକାନଗିରି ଅତିରିକ୍ତ ଜିଲ୍ଲାପାଳ ବିରସେନ ପ୍ରଧାନ ରାଜକୀୟ ବେଶରେ ଆସି ଛେରା ପହଁରା କରିଥିଲେ । ଏହା ପରେ ରଥ ଟଣା କାର୍ଯ୍ୟ ଆରମ୍ଭ ହୋଇଥିଲା । ସମସ୍ତ ନୀତିନିର୍ଘଣ୍ଟ ଶୃଙ୍ଖଳିତ ଭାବେ ଶେଷ ହେବ ପରେ ଶ୍ରୀବିଗ୍ରହଙ୍କ ରଥକୁ ଭକ୍ତ ଗଣ ଭକ୍ତି ଓ ଶ୍ରଦ୍ଧାର ସହ ଟାଣି ଟାଣି ଜଗତର ନାଥ ଜଗନ୍ନାଥ ମହାପ୍ରଭୁଙ୍କ ନିଜ ଘରକୁ ନେଇଥିଲେ।
ବାହୁଡାରେ ସାମିଲ ହେବା ପାଇଁ ମାଲକାନଗିରି ଜିଲ୍ଲା ସହ ପଡ଼ୋଶୀ ଛତିଶଗଡ଼ ଓ ଆନ୍ଧ୍ର ପ୍ରଦେଶ ରାଜ୍ୟରୁ ଲକ୍ଷାଧିକ ଭକ୍ତଙ୍କ ସମାଗମ ହୋଇଥିଲା । କିଛି ଦିନ ଧରି ବର୍ଷା ଲାଗି ରହିଥିବା ବେଳେ କିନ୍ତୁ ଆଜି କାଳିଆର ବାହୁଡା ଯାତ୍ରାରେ ପାଗ ଠିକ ହୋଇ ମେଘୁଆ ପାଗ ସୃଷ୍ଟି ହୋଇଥିବା ବେଳେ ମାଲକାନଗିରି ସହର ପାଲଟି ଥିଲା ଜନସମୁଦ୍ର । ଏପଟେ ସୁରକ୍ଷା ବ୍ୟବସ୍ଥା ମଧ୍ୟ କଡାକଡି କରାଯାଇଥିଲା ।
ସେପଟେ ରାଇରଙ୍ଗପୁରରେ ମଧ୍ୟ ଜନ୍ମବେଦୀରୁ ନବଦିନାତ୍ମକ ଯାତ୍ରା ସାରି ବାହୁଡିଛନ୍ତି ଦାରୁବ୍ରହ୍ମ। ନୀତି ଅନୁସାରେ, ସକାଳୁ ପ୍ରଭୁ ଜଗନ୍ନାଥ ବଳଭଦ୍ର ଓ ଦେବୀ ଶୁଭଦ୍ରାଙ୍କ ସମସ୍ତ ନୀତିକାନ୍ତି ସମ୍ପନ୍ନ କରିଥିଲେ ମୁଖ୍ୟ ପୂଜକ। ଶଙ୍ଖ ଘଣ୍ଟ ହୁଳହୁଳି ହରିବୋଲ ନାଦରେ ଦିନ ପ୍ରାୟ ୧୦.୩୦ ସମୟରେ ଚତୁର୍ଦ୍ଧା ମୂର୍ତ୍ତିଙ୍କୁ ଗୋଟି ପହଣ୍ଡିରେ ଅଣାଯାଇ ରଥାରୂଢ କରାଯାଇଥିଲା।
ଶ୍ରୀଜୀଉଙ୍କ ବାହୁଡା ଯାତ୍ରା ଦେଖିବା ତଥା ରଥ ଟାଣିବା ପାଇଁ ଲୋକାରଣ୍ୟ ହୋଇଉଠିଥିଲା ରାଇରଙ୍ଗପୁର ସହର। ଅପରାହ୍ନ ଚାରିଟା ସମୟରେ ରାଇରଙ୍ଗପୁର ଉପଜିଲ୍ଲାପାଳ ବିଧିପୂର୍ବକ ଛେରାପହଁରା ନୀତି ସମ୍ପନ୍ନ କରିଥିଲେ। ଝାଡ଼ଖଣ୍ଡ ରାଜ୍ୟପାଳ ଦ୍ରୌପଦୀ ମୁର୍ମୁ ରାଇରଙ୍ଗପୁର ଗସ୍ତରେ ଆସି ରଥ ଉପରେ ଶ୍ରୀଜୀଉଙ୍କୁ ପୂଜାପାଠ କରିବା ସହ ପ୍ରଭୁଙ୍କ ରଥ ମଧ୍ୟ ଟାଣିଥିଲେ। ହଜାର ହଜାର ଭକ୍ତ ରଥ ଟାଣିଥିଲେ । ଅନ୍ୟପଟେ ଭିଡକୁ ଦୃଷ୍ଟିରେ ରଖି ପ୍ରଶାସନ ତରଫରୁ ସୁରକ୍ଷା ବ୍ୟବସ୍ଥା କଡାକଡି କରାଯାଇଥିଲା।
ମାଲକାନଗିରିରୁ ଜୟନ୍ତ ତିଆଡି ଓ ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
