ମାଲକାନଗିରି: ଚିତ୍ରକୋଣ୍ଡା ସ୍ବାଭିମାନ ଅଞ୍ଚଳରେ ସୁରକ୍ଷା କର୍ମୀଙ୍କୁ ମିଳିଛି ବଡଧରଣର ସଫଳତା। ମାଲକାନଗିରି ଜିଲ୍ଲା ଚିତ୍ରକୋଣ୍ଡା ବ୍ଲକ ଅନ୍ତର୍ଗତ ଗୋରାସେତୁ ନିକଟସ୍ଥ ହାଣ୍ଡିଖାଲ ଜଙ୍ଗଲରୁ ସ୍ଥାନୀୟ ବିଏସଫକୁ ୫ କେଜି ଓଜନର ଅଫୁଟା ଲ୍ୟାଣ୍ଡ ମାଇନ ଜବତ କରିଛି। ଏହାସହ ମାଓ ପୋଷାକ,ପଲିଥିନ,ମଲ୍ଟିମିଟର, ଓକିଟକି, ସମେତ ବହୁ ମାଓ ସାମଗ୍ରୀ ଜବତ କରିଛି।
ସୂଚନା ଅନୁଯାୟୀ, କୌଣସି ବିଶେଷ ସୂତ୍ରରୁ ଖବର ପାଇ ସ୍ଥାନୀୟ ବିଏସଫ ତରଫରୁ ପଣସଫୁଟ ପଞ୍ଚାୟତ ଓ ଗୋରାସେତୁ ନିକଟରେ ଥିବା ହାଣ୍ଡିଖାଲ ଜଙ୍ଗଲରେ ସର୍ଚ୍ଚ ଅପରେସନ କରାଯାଇଥିଲା। ଏହି ସମୟରେ ଏକ ଡ୍ରମରେ ପୋତା ହୋଇ ରଖାଯାଇଥିବା ୫ କେଜି ଓଜନର ଅଫୁଟା ଲ୍ୟାଣ୍ଡ ମାଇନ ସମେତ ବହୁ ମାଓ ସାମଗ୍ରୀ ଜବତ କରାଯାଇଛି ।
କୌଣସି ଏକ ବଡ ଧରଣର ଅଘଟଣ ଘଟାଇବାକୁ ମାଓବାଦୀ ଏହି ସାମଗ୍ରୀକୁ ଜଙ୍ଗଲରେ ଲୁଚାଇ ରଖିଥିବା ନେଇ ଅନୁମାନ କରାଯାଉଛି । ଜବତ ଅଫୁଟା ଲ୍ୟାଣ୍ଡ ମାଇନକୁ ବୋମା ନିଷ୍କ୍ରିୟ ଦଳ ପହଁଞ୍ଚିବା ପରେ ନିଷ୍କ୍ରିୟ କରାଯିବ।
ମାଲକାନଗିରିରୁ ଦେବଦତ୍ତ ବେହେରା,ଇଟିଭି ଭାରତ
