ମାଲକାନଗିରି: ଭଣ୍ଡୁର ହୋଇଗଲା ମାଓବାଦୀଙ୍କ ଚାଲ । ପୋଲ ତଳେ ଖଞ୍ଜିଥିବା ଲ୍ୟାଣ୍ଡମାଇନକୁ ସନ୍ଧାନୀ କୁକୁର ସହାୟତରେ ବାହାର କରିବା ପରେ, ଏହାକୁ ନିଷ୍କ୍ରିୟ କରିଛନ୍ତି ବିଏସଏଫ ଯବାନ । ଲାଲଗଡ ମାଲକାନଗିରିର କାଲିମେଳା ଥାନା ଅନ୍ତର୍ଗତ ଏମପିଭି-126 ଗ୍ରାମରେ ଥିବା ପୋଲ ତଳେ ସୁରକ୍ଷାକର୍ମୀଙ୍କୁ ଟାର୍ଗେଟ କରି ଲ୍ୟାଣ୍ଡମାଇନ ଖଞ୍ଜିଥିଲେ ମାଓବାଦୀ । ହେଲେ ଆଗକୁ ହେବାକୁ ସାମ୍ଭାବ୍ୟ ବିପଦକୁ ସଫଳତାର ସହ ପଣ୍ଡ କରିଛି ବିଏସଏଫ ।
ଏମପିଭି-72 ଗ୍ରାମରେ ଥିବା 76 ବାଟାଲିୟନର ବିଏସଏଫ ଯବାନ ରୁଟିନ କୁମ୍ବିଂ ଅପରେସନ ଜାରି ରଖିଥିବା ବେଳେ, ପୋଲ ତଳେ ଏହି ବିସ୍ଫୋରକ ସାମଗ୍ରୀ ଥିବାର ସୂଚନା ସନ୍ଧାନୀ କୁକୁର ସହାୟତରେ ପାଇଥିଲେ । ପରେ ଏହାକୁ ମାଟି ତଳୁ ବାହାର କରାଯାଇ ନିଷ୍କ୍ରିୟ କରାଯାଇଥିଲା ।
ଗତ 2008ରେ ଏମପିଭି ପୋଲ ତଳେ ସମାନ ଢଙ୍ଗରେ ଲ୍ୟାଣ୍ଡମାଇନ ଖଞ୍ଜିଥିଲେ ମାଓବାଦୀ । ଏହି ବିସ୍ଫୋରଣରୁ ଆଣ୍ଟି ଲ୍ୟାଣ୍ଡମାଇନ ଗାଡି ଉଡି ଯିବା ସହ ଜଣେ ପୋଲିସ ଆରଆଇଙ୍କ ସମେତ 17 ଜଣ ଯବାନ ସହିଦ ହୋଇଥିଲେ । ଏମଭି-126 ଗ୍ରାମର ପୋଲ ତଳୁ ଲ୍ୟାଣ୍ଡମାଇନ ଉଦ୍ଧାର ହେଉଥିବା ବେଳେ, କାଲିମେଳା ଠାରୁ ମୋଟୁ ଯୋଡୁ ଥିବା ରାସ୍ତାକୁ ପ୍ରାୟ 1ଘଣ୍ଟା ଧରି ବନ୍ଦ ରଖା ଯାଇଥିଲା । ଆଗକୁ ମାଓବାଦୀ ସହିଦ ସପ୍ତାହ ପାଳନ କରିବାକୁ ଯାଉ ଥିବାବେଳେ ନିଜର ସ୍ଥିତି ଜାହିର କରିବା ପାଇଁ ସେମାନେ ଏହି ବିସ୍ଫୋରକ ଲଗାଇଥିବା ଜଣାପଡିଛି । ଯାହାକୁ ଦୃଷ୍ଟିରେ ରଖି ମାଲକାନଗିରି ସୀମାନ୍ତରେ ସୁରକ୍ଷା ବ୍ୟବସ୍ଥାକୁ ସୁଦୃଢ କରାଯାଇଛି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ ।
