ମାଲକାନଗିରି: ଗ୍ରୀଷ୍ମର ପ୍ରବାହ ସାଙ୍ଗକୁ ଅସହ୍ୟ ଗୁଳିଗୁଳି ସହ ଘନଘନ ବିଜୁଳିକାଟ, ଯାହା ଲୋକଙ୍କୁ ଅଣନିଶ୍ବାସୀ କରିଦେଉଛି । ହେଲେ ବିଜୁଳିର ଦେଖା ନାହିଁ । ଫଳରେ ଲୋ ଭୋଲ୍ଟେଜ, ବାରମ୍ବାର ବିଦ୍ୟୁତ୍ କାଟ ଓ ଅସହ୍ୟ ଗରମରେ ଯୁଝି ହେଉଛନ୍ତି ମାଲକାନଗିରି କାଲିମେଳା ଓ ପଡିଆ ଅଞ୍ଚଳ ବିଦ୍ୟୁତ ଉପଭୋକ୍ତା । ଗ୍ରୀଡ୍ କାମ ସରି ଚାରି ବର୍ଷ ବିତିଥିବା ବେଳେ ଚାର୍ଯ କରି ବିଦ୍ୟୁତ୍ ବିଭାଗକୁ ଓପିଟିସିଏଲ୍ (OPTCL) ହସ୍ତାନ୍ତର କରୁନଥିବା ଅଭିଯୋଗ କରିଛନ୍ତି ବିଦ୍ୟୁତ ଉପଭୋକ୍ତା ।
ବିଦ୍ୟୁତ ସମସ୍ୟାର ସମାଧାନ ପାଇଁ 2016 ମସିହାରେ ରାଜ୍ୟ ସରକାରଙ୍କ ବିଦ୍ୟୁତ୍ ବିଭାଗ ପକ୍ଷରୁ କାଲିମେଳା ଠାରେ ରାଜିବ ଜ୍ୟୋତି ଯୋଜନାରେ 46 କୋଟି ବ୍ୟୟରେ ଓପିଟିସିଏଲ୍ ଦ୍ବାରା ଆରମ୍ଭ କରାଯାଇଥିଲା ଗ୍ରୀଡ୍ କାମ । ଏହି ଗ୍ରୀଡଟି ମାର୍ଚ୍ଚ 1019 ମସିହାରେ ସରିଥିଲେ ମଧ୍ୟ ଆଜି ପର୍ଯ୍ୟନ୍ତ ଚାର୍ଯ କରାଯାଇ ବିଦ୍ୟୁତ୍ ଉପଭୋକ୍ତାଙ୍କୁ ବିଦ୍ୟୁତ ଦିଆଯାଇନାହିଁ । ଯାହା ଫଳରେ ଏହି ଅଞ୍ଚଳର ଦୁଇ ଲକ୍ଷ ବିଦ୍ୟୁତ ଉପଭୋକ୍ତା ଲୋ ଭୋଲ୍ଟେଜ, ବାରମ୍ବାର ବିଦ୍ୟୁତ୍ କାଟ୍ ଭଳି ସମସ୍ୟାର ସମ୍ମୁଖୀନ ହେଉଛନ୍ତି ।
ଏନେଇ ଓପିଟିସିଏଲ୍ ର ଅଧିକାରୀଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରିଥିଲେ ମଧ୍ୟ ଯୋଗାଯୋଗ ହୋଇ ପାରିନଥିଲା । ଅନ୍ୟପଟେ ବିଦ୍ୟୁତ ବିଭାଗର ନିର୍ବାହି ଯନ୍ତ୍ରୀଙ୍କୁ ପଚାରିବାରୁ ବନ ବିଭାଗର ମଞ୍ଜୁରି ମିଳିବାରେ ବିଳମ୍ବ ହେଉଥିଲା କିନ୍ତୁ ବର୍ତମାନ ମଞ୍ଜୁରି ମିଳିଯାଇଥିବାରୁ ଗ୍ରିଡ୍ ର ଟେଷ୍ଟିଂ କାମ ଆରମ୍ଭ କରାଯାଇଛି ଏଣୁ ଏହା ଆସନ୍ତା ଜୁଲାଇ ମାସ ପ୍ରଥମ ସପ୍ତାହ ସୁଧା ଆରମ୍ଭ କରାଯିବ ବୋଲି ଓପିଟିସିଏଲର କର୍ତ୍ତୃପକ୍ଷ ସୂଚନା ଦେଇଥିବା ସେ କହିଛନ୍ତି । ଏହି ଗ୍ରିଡ୍ ଉପରେ ରାଜ୍ୟ ସରକାର ସ୍ବତନ୍ତ୍ର ଦୃଷ୍ଟି ରଖିଛନ୍ତି ଏବଂ ଏହାର ଉଦଘାନ ମୁଖ୍ୟମନ୍ତ୍ରୀଙ୍କ ଦ୍ବାରା କରାଯିବ କହିଛନ୍ତି ସ୍ୱତନ୍ତ୍ର ବିକାଶ ପରିଷଦ ଅଧ୍ୟକ୍ଷ ମାନସ ମାଡକାମି । ଯେଉଁ କାମ ଦିର୍ଘ ଚାରିବର୍ଷ ହେଲା ସରିପାରିନି ଆସନ୍ତା ଜୁଲାଇ ମାସ ତଥା ଦୁଇ ମାସ ମଧ୍ୟରେ ସତରେ ଏହା ଲୋକଙ୍କ କାର୍ଯ୍ୟର ଆସିବ ବୋଲି ସାଧାରଣରେ ପ୍ରଶ୍ନ ଉଠୁଛି ।
ମାଲକାନଗିରିରୁ ପଞ୍ଜାନନ ଦାଶ, ଇଟିଭି ଭାରତ
