ମାଲକାନଗିରି: ଜିଲ୍ଲାର କୋରକୋଣ୍ଡା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଡାକ୍ତରଙ୍କ ସହ ଖବର ସଂଗ୍ରହ କରୁଥିବା କିଛି ଗଣମାଧ୍ୟମ ପ୍ରତିନିଧିଙ୍କ ସହିତ ବଚସା ଘଟଣା । ଡାକ୍ତରଙ୍କ ଅଭିଯୋଗକୁ ଆଧାର କରି ପୋଲିସର ଏକ ଟିମ ୫ ଜଣ ସାମ୍ବାଦିକଙ୍କୁ ଘରୁ ଉଠାଇ ଆଣିଥିବା ଜଣାପଡି଼ଛି । ଏହାର ପ୍ରତିବାଦରେ ଜିଲ୍ଲା ସାମ୍ବାଦିକ ସଂଘ ଥାନା ଘେରାଉ କରିବା ସହିତ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଧାରଣା ଦେଇଛି ।
ମିଳିଥିବା ସୂଚନା ଅନୁସାରେ ଗୁରୁବାର ରାତି 11ଟା 30 ମିନିଟ ସମୟରେ ଖବର ପ୍ରସାରଣ କରୁଥିବାବେଳେ ଡାକ୍ତରଙ୍କ ସହ ବଚସା ହୋଇଥିଲା । ଶୁକ୍ରବାର ଡାକ୍ତରଙ୍କ ଅଭିଯୋଗ କ୍ରମେ ରାତି 2ଟା ସମୟରେ ପୋଲିସର ଏକ ଟିମ 5 ଜଣ ସାମ୍ବାଦିକକୁ ଘରୁ ଉଠାଇ ଆଣିଥିଲେ । ଗତକାଲି(ଶନିବାର) ଏହି 5 ଜଣ ସାମ୍ବାଦିକଙ୍କୁ କୋର୍ଟ ଚାଲାଣ କରିଯାଇଥିଲା ।
ସେପଟେ ଏହି ଘଟଣାରେ ସାମ୍ବାଦିକମାନେ ଡାକ୍ତରଙ୍କ ବିରୋଧରେ ଏତଲା ଦେଇଥିଲେ ମଧ୍ୟ ବର୍ତ୍ତମାନ ପର୍ଯ୍ୟନ୍ତ ପୋଲିସ ଏତଲାକୁ ରେଜିଷ୍ଟ୍ରି କରିନାହିଁ । ଯାହାକୁ ପ୍ରତିବାଦ କରି ଆଜି(ରବିବାର) ଜିଲ୍ଲା ସାମ୍ବାଦିକ ସଂଘ ଥାନା ଘେରାଉ କରିବା ସହିତ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଧାରଣା ଦେଇଛନ୍ତି ।
ଗୋଟିଏ ଘଟଣାରେ ୨ଟି FIR ହୋଇଥିବାବେଳେ ଗୋଟିଏ ପକ୍ଷରୁ 5 ଜଣ ସାମ୍ବାଦିକଙ୍କୁ ଗିରଫ କରି କୋର୍ଟ ଚାଲାଣ କରିବା ଓ ଅନ୍ୟପକ୍ଷରେ ଏତଲା ନ ରଖିବାକୁ ନିନ୍ଦା କରିଛି ଜିଲ୍ଲା ସାମ୍ବାଦିକ ସଂଘ । ଦାବି ପୂରଣ ନ ହେବା ପର୍ଯ୍ୟନ୍ତ ଧାରଣା ଦିଆଯିବ ବୋଲି ସାମ୍ବାଦିକ ସଂଘ ପକ୍ଷରୁ ଧମକ ଦିଆଯାଇଛି ।
ମାଲକାନଗିରିରୁ ପଞ୍ଚାନନ ଦାଶ, ଇଟିଭି ଭାରତ
