ମାଲକାନଗିରି: ପୁଣି ମୃତଦେହକୁ ଅସମ୍ମାନ । 30 କିମି ଭାରରେ ମୃତଦେହକୁ ବୋହି ବୋହି ନିଜ ଗ୍ରାମକୁ ନେଲେ ସମ୍ପର୍କୀୟ । ଏଭଳି କିଛି ଅଭାବନୀୟ ଘଟଣା ଦେଖିବାକୁ ମିଳିଛି ମାଲକାନଗିରି ଜିଲ୍ଲା ମାଥିଲି ବ୍ଲକ ଟେମୁରୁପାଲ୍ଲୀ ଗ୍ରାମରେ ।
ମାଲକାନଗିରି ଜିଲ୍ଲାରେ ଅନେକ ଗାଁର ରାସ୍ତା ଭଲ ନଥିବାରୁ ଗ୍ରାମକୁ ଆମ୍ବୁଲାନ୍ସ ଯାଇ ନ ପାରି ରୋଗୀଙ୍କୁ ଖଟିଆ କିମ୍ବା ଭାରରେ ବୁହା ହେଉଥିବା ଘଟଣା ନିତିଦିନ ଲୋକଲୋଚନକୁ ଆସୁଛି । ତେବେ ଆଜି ଏଭଳି ଏକ ଘଟଣା ସାମ୍ନାକୁ ଆସିଛି ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଦେବ । ମୃତଦେହ ଭାରରେ ବୋହି ଆଣିବା କଥା ଜଣାପଡିବା ପରେ ଏହା ପଛରେ ଆଉ ଏକ ଅନ୍ଧ ବିଶ୍ବାସ ସାମ୍ନାକୁ ଆସିଛି ।
ମୁଡେ କାଲମାରି ନାମକ ଜଣେ ମହିଳାଙ୍କୁ ଜ୍ବର ହେବା ସହ ହାତ ଗୋଡ ବିନ୍ଧା ହୋଇଥିଲା । ଯାହାର ଚିକିତ୍ସା ପାଇଁ ପରିବାର ଲୋକେ ତାଙ୍କୁ ଗୁରୁଗୁଡା ଗ୍ରାମର ଜଣେ ଗୁଣିଆଙ୍କ ପାଖକୁ ନେଇଥିଲେ । ଯେଉଁଠି 2 ଦିନ ଚିକିତ୍ସା କରାଇବା ପରେ ବୁଧବାର ରାତିରେ ରୋଗୀଙ୍କ ମୃତ୍ୟୁ ଘଟିଥିଲା ।
ତେବେ ପରିବାର ଲୋକେ ପ୍ରଥମେ ଗୁଣିଆ ପାଖକୁ ନୁହେଁ ବଂର ମାଥିଲି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଚିକିତ୍ସା ପାଇଁ ନେଇଥିଲେ ବୋଲି କହିଛନ୍ତି । ଖାଲି ସେତିକି ନୁହେଁ ଡାକ୍ତର ଏଠାରେ ଚିକିତ୍ସା ହେବ ନାହିଁ ବୋଲି କହିବା ସହ ଘରକୁ ନେଇଯାଅ ବୋଲି କହିଥିବା ପରିବାର ଲୋକେ ଅଭିଯୋଗ କରିଛନ୍ତି । ଯାହା ଫଳରେ ସେମାନେ ତାକୁ ଗୁଣିଆ ପାଖକୁ ନେଇଥିଲେ ବୋଲି ଦର୍ଶାଇଛନ୍ତି ।
ରୋଗୀର ମୃତ୍ୟୁ ପରେ ନିଜ ଗ୍ରାମକୁ ଗାଡି ଭଡା କରି ନେବାକୁ ଟଙ୍କା ନଥିବାରୁ ପରିବାର ବର୍ଗ ଓ ସମ୍ପର୍କୀୟମାନେ ମିଶି ପ୍ରାୟ 30 କିଲୋମିଟର ଖଟିଆରେ ବୋହି ନେଇଥିବା ଦେଖିବାକୁ ମିଳିଛି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
