ମାଲକାନଗିରି: ଜିଲ୍ଲାର ଖଇରପୁଟ ବ୍ଲକ ସଦର ମହକୁମା ଠାରେ ଥିବା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସା ଅବହେଳାରୁ ଦେଢ଼ ବର୍ଷର ଶିଶୁକନ୍ୟା ଜ୍ୟାକ୍ଲିନ କୋବ୍ରାର ମୃତ୍ୟୁ ଘଟିଛି । ଗତକାଲି ରାତିରେ ତା'ର ମୃତ୍ୟୁ ହୋଇଥିବା ନେଇ ପରିବାର ଲୋକେ ଏବଂ ସମ୍ପକୀୟ ଅଭିଯୋଗ କରିଛନ୍ତି । ଗତ ସୋମବାର ଶିଶୁଟିର ଦେହ ଖରାପ ହେବାରୁ ତାକୁ ମେଡିକାଲକୁ ନେଇ ଯାଇଥିଲେ ପରିବାର ଲୋକେ । ସେଟାରେ ଡାକ୍ତର ଚିକିତ୍ସା କରିବା ବଦଳରେ ଦୁର୍ବ୍ୟବହାର କରି କହିଥିଲେ ଯେ ଏହି ସମୟରେ କଣ ଆଣିବା କଥା । ଏହା କହି ସମ୍ପୃକ୍ତ ଡାକ୍ତର ଜଣକ ନିଜ ମୋବାଇଲରେ ବ୍ୟସ୍ତ ରହିଥିଲେ ।
ସେଠାରେ ଶିଶୁର ସମ୍ପର୍କୀୟ କାକୁତିମିନତୀ ହେଲାପରେ ତା'ର ଚିକିତ୍ସା କରିଥିଲେ । ପରେ ରକ୍ତ ପରୀକ୍ଷା କରିବା ପାଇଁ ପଠାଇ ଥିଲେ । କିନ୍ତୁ ବିଡମ୍ବନାର ବିଷୟ ଏହା ଯେ ଏ ପର୍ଯ୍ୟନ୍ତ ରକ୍ତ ପରୀକ୍ଷାର ରିପୋର୍ଟ ଆସିନାହିଁ । ପରେ ଯେତେବେଳେ ଶିଶୁର ସମ୍ପର୍କୀୟ ରିପୋର୍ଟ ଆଣିବା ପାଇଁ ଗଲେ ପରେ ଆସ ବୋଲି କହି ଆଜି ପର୍ଯ୍ୟନ୍ତ ଦେଇନାହାନ୍ତି । ଗତ କାଲି ଶିଶୁର ଦେହ ଗୁରୁତର ହୋଇଯାଇଥିଲା ଏବଂ ବିଳମ୍ବିତ ରାତିରେ ଶିଶୁର ମୃତ୍ୟୁ ହୋଇଥିଲା । ଯାହାକୁ ନେଇ ସମ୍ପର୍କୀୟ ଏବେ ଅଭିଯୋଗ କରିଛନ୍ତି ଯେ ଚିକିତ୍ସା ଅବହେଳା କରିଥିବାରୁ ଆମ ଶିଶୁର ମୃତ୍ୟୁ ହୋଇଛି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
