ମାଲକାନଗିରି : ପୌର ନିର୍ବାଚନକୁ ନେଇ ସରଗରମ ରହିଛି ରାଜନୀତି । ନିର୍ବାଚନ ତାରିଖ ଯେତେ ପାଖେଇ ଆସୁଛି ପ୍ରଚାରକୁ ମଧ୍ୟ ସେହି ଅନୁସାରେ ଜୋରଦାର କରୁଛନ୍ତି ପ୍ରାର୍ଥୀ ।
ଦୁଇଦିନ ତଳେ ବିଜେଡିର ଷ୍ଟାର ପ୍ରଚାରକ ଭାବେ ଓଲିଉଡ ଅଭିନେତ୍ରୀ ରୀୟା ଦେ ମାଲକାନଗିରି ସହରର ମୁଖ୍ୟରାସ୍ତା ସହ 19ଟି ଓ୍ବାର୍ଡରେ ରୋଡ ସୋ କରି ବିଜେଡିର ପୌର ଅଧ୍ୟକ୍ଷ ପ୍ରାର୍ଥୀ ମନୋଜ ବାରିକ (ଭାନୁ ଭାଇ) ଓ ପୌର ପରିଷଦ ପ୍ରାର୍ଥୀମାନଙ୍କ ପାଇଁ ଭୋଟ ଭିକ୍ଷା କରିଥିଲେ । ସେହିଭଳି ସୋମବାର ନବରଙ୍ଗପୁର ସାସଂଦ ରମେଶ ଚନ୍ଦ୍ର ମଝୀ ବିଜେଡି କର୍ମୀଙ୍କ ସହ ମିଶି ସହରର ବିଭିନ୍ନ ଓ୍ବାର୍ଡ ବୁଲି ଭୋଟରଙ୍କୁ ସରକାରଙ୍କ ଲୋକାଭିମୁଖି ଯୋଜନା ମାନ ବୁଝାଇ ଭୋଟଭିକ୍ଷା କରିଥିଲେ ।
ଅପରପକ୍ଷରେ ବିଜେପି ରାଜ୍ୟ ସଭାପତି ସମିର ମହାନ୍ତି ରବିବାର ବାଲିମେଳା ବିଜ୍ଞାପିତ ଅଞ୍ଚଳ ପରିଷଦରେ ନିର୍ବାଚନ ପ୍ରଚାର କରିବା ସହ ମାଲକାନଗିରି ସହରରେ ରୋଡ ସୋ କରିଛନ୍ତି । ସଦର ବ୍ଳକ ପଡିଆ ଠାରେ ଏକ ବୈଠକରେ ଯୋଗ ଦେଇ ପୌର ପରିଷଦ ଅଧ୍ୟକ୍ଷ ସାମଳ ସୁନାନି ଓ ଓ୍ବାର୍ଡ ପରିଷଦଙ୍କ ପାଇଁ ଭୋଟ ମାଗିଥିଲେ ।
ସହରରେ ବିଜେପି ଓ ବିଜେଡିର ବହୁ ନେତା ଆସି ନିର୍ବାଚନ ପ୍ରଚାର କରୁଥିବାବେଳେ କଂଗ୍ରେସର ପୌର ପରିଷଦ ଅଧ୍ୟକ୍ଷ ପ୍ରାର୍ଥୀ ଜି ଶ୍ରୀନିବାସ ରାଓ (ଚଟି ଭାଇ) କର୍ମୀ ଓ ପୌର ପରିଷଦ ପ୍ରାର୍ଥୀମାନଙ୍କୁ ନେଇ ଘର ଘର ବୁଲି ପ୍ରଚାର କରୁଥିବା ଦେଖିବାକୁ ମିଳିଛି । ଅପର ପକ୍ଷରେ ସେ କହିଛନ୍ତି ତାଙ୍କ ପାଇଁ 19ଟି ଓ୍ବାର୍ଡର ଭୋଟର ମାନେ ହିଁ ତାଙ୍କ ପାଇଁ ଷ୍ଟାର୍ ପ୍ରଚାରକ ।
ମାଲକାନଗିରିରୁ ପଞ୍ଚାନନ ଦାଶ, ଇଟିଭି ଭାରତ
