ମାଲକାନଗିରି: ବିଜେପି ପ୍ରାର୍ଥୀ ତାଲିକା ଘୋଷଣା ପରେ ଦଳୀୟ କନ୍ଦଳ ପଦାରେ ପଡିଛି । ଟିକେଟ୍କୁ ନେଇ ପ୍ରମୁଖ ରାଜନୈତିକ ଦଳ ଗୁଡିକ ମଧ୍ୟରେ ଅସନ୍ତୋଷ ବୃଦ୍ଧି ପାଇଛି । ଟିକେଟ୍ ନ ପାଇ ଅନେକ ଆଶାୟୀ ବିଦ୍ରୋହ କରୁଥିବା ବେଳେ ମାଲକାନଗିରିରେ ମଧ୍ୟ ଟିକେଟ୍କୁ ନେଇ ବିଦ୍ରୋହ ମୁଣ୍ଡ ଟେକିଛି ।
ମାଲକାନଗିରିର ଚିତ୍ରକୋଣ୍ଡା ନିର୍ବାଚନ ମଣ୍ଡଳ ପାଇଁ ବିଜେପି ପଦୁ ମାଝିଙ୍କୁ ଟିକେଟ୍ ଦେଇଛି । ଯାହାକୁ ନେଇ ବିଜେପିର ବରିଷ୍ଠ ନେତା ତଥା ପୂର୍ବତନ ଉପବାଚସ୍ପତି ପ୍ରହଲ୍ଲାଦ ଦୋରା ପ୍ରଶ୍ନ ଉଠାଇଛନ୍ତି । ସେ ପ୍ରଶ୍ନ କରିଛନ୍ତି ଶ୍ରୀ ମାଝି ଓବିସି ବର୍ଗର ହୋଇଥିବା ବେଳେ କିପରି ଆଦିବାସୀ ଜାତିଗତ ପ୍ରମାଣ ପତ୍ର ପାଇଲେ ? କେବଳ ସେତିକି ନୁହେଁ ପଦୁ ମାଝୀ ଜଣେ ଗଞ୍ଜେଇ ବ୍ୟବସାୟୀ ବୋଲି ଅଭିଯୋଗ କରିଛନ୍ତି ଶ୍ରୀ ଦୋରା । ଏଥିପାଇଁ ସେ ଜିଲ୍ଲାପାଳଙ୍କୁ ଚିଠି ଲେଖିଥିବା ଜଣାଇଛନ୍ତି ।
ତେଣୁ ପୁଣି ଥରେ ଦଳ ଚିତ୍ରକୋଣ୍ଡା ଆସନ ପାଇଁ ପ୍ରାର୍ଥୀ ବିଚାର କରୁ ବୋଲି କର୍ମୀମାନେ ଦାବି କରିଛନ୍ତି । ଏଥିସହ ପଦୁ ମାଝୀଙ୍କୁ ନିର୍ବାଚନ ଲଢିବା ପାଇଁ ଅନୁମତି ନ ଦେବାକୁ ଅନୁରୋଧ କରିଛନ୍ତି । ଆଗକୁ ଦଳର ଏହି ନିଷ୍ପତ୍ତି ବିରୋଧରେ ଶାନ୍ତିପୂର୍ଣ୍ଣ ଆନ୍ଦୋଳନ କରିବ ବୋଲି ପ୍ରହଲ୍ଲାଦ ଦୋରା କହିଛନ୍ତି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
