କୋରାପୁଟ: କିଛି କାଗଜ ଉପରେ ଅକ୍ଷର ଓ ଚିତ୍ରର ସମାହାରକୁ ନେଇ ଯୁଗ ଯୁଗ ଧରି ମାନବ ସଭ୍ୟତାର ଇତିହାସକୁ ବହନ କରି ଚାଲିଛି ବହି । ପୀଢ଼ି ପରେ ପୀଢ଼ିକୁ ନିଜ ଅସ୍ତିତ୍ଵର ମୂଳ ଆଧାର ପ୍ରତି ସଚେତନ କରି ଆସିଛି ଏହି ବହି । ମୋବାଇଲ, କମ୍ପ୍ୟୁଟର, ଟାବ୍ଲେଟ୍ ଭଳି ଯାନ୍ତ୍ରିକ ଉପକରଣ ଆସିବା ପରେ କିଛି ବର୍ଷଲ ପାଇଁ ଯୁବପୀଢ଼ି ବହିରୁ ମୁହଁ ଫେରାଇ ନେଉଥିବା ଆଶଙ୍କା ପ୍ରକାଶ ପାଇଥିଲା । କିନ୍ତୁ ଧୀରେ ଧୀରେ ଯୁବପୀଢି ନିଜେ ବହି ପଢିବା ସହ ନିଜ ଓ ବନ୍ଧୁଙ୍କ ପାଇଁ କିଣିବା ଆରମ୍ଭ କରିଛନ୍ତି ବହିଟିଏ ।
ଯୁବକ ଯୁବତୀମାନେ ବହିକୁ ବର୍ତ୍ତମାନ ନିଜର ଅତି ଘନିଷ୍ଠ ବନ୍ଧୁ ବୋଲି କହୁଥିବା ବେଳେ ଅନେକ ଯୁବକ ଯୁବତୀ ପାଠାଗାରରେ ବହି ପଢିବା ପାଇଁ ସମୟ କାଢୁଛନ୍ତି । ଯାହା ଏକ ଶୁଭ ଲକ୍ଷଣ ବୋଲି ଶହୀଦ ଲକ୍ଷ୍ମଣ ନାୟକ ମେଡିକାଲ କଲେଜ ଓ ହସ୍ପିଟାଲର ଲାଇବ୍ରେରିଆନ ସତ୍ୟନାରାୟଣ ପ୍ରଧାନ ଜଣାଇଛନ୍ତି ।
ସେହିପରି ପୂର୍ବ ଅପେକ୍ଷା ଅଧିକ ସଂଖ୍ୟାରେ ପିଲା ଓ ଯୁବକ ଯୁବତୀ ଛୋଟ ଗପ ବହିଠାରୁ ଆରମ୍ଭ କରି ଜାତୀୟ ତଥା ଅନ୍ତର୍ଜାତୀୟସ୍ତରରେ ଖ୍ୟାତି ଅର୍ଜନ କରିଥିବା ବିଭିନ୍ନ ବହି କିଣି ପଢିବା ପସନ୍ଦ କରୁଛନ୍ତି । ଯାହା ଜଣାଇଛନ୍ତି ସହରରେ ପୁସ୍ତକ ବ୍ୟବସାୟୀ କିଟୁ ପାଣିଗ୍ରାହୀ ।
କୋରାପୁଟରୁ ସିଏଚ୍ ଶାନ୍ତାକାର, ଇଟିଭି ଭାରତ
