କୋରାପୁଟ: ନିକଟରେ କୋଲାବ ଜଳଭଣ୍ଡାର ନିର୍ମାଣ କରିବା ପାଇଁ ଶହ ଶହ ପରିବାରଙ୍କୁ ବିସ୍ଥାପିତ କରି ସରକାର କୋଟପାଡ ଅଞ୍ଚଳରେ ପାଞ୍ଚଟି କଲୋନୀରେ ଥଇଥାନ କରାଇଥିଲେ । ମାତ୍ର 'ଜଳ ହିଁ ଜୀବନ'ର ସ୍ଲୋଗାନ ଦେଉଥିବା ସରକାର ସେମାନେ କିପରି ଢୋକେ ପାଣି ପାଇବେ ସେ ନେଇ ବିଫଳ ହୋଇଥିଲେ । ମାତ୍ର ଶୋଭା ସ୍ବେଚ୍ଛାସେବୀ ସଙ୍ଗଠନର ଉଦ୍ୟମରେ ଏବେ ତିନୋଟି ଗାଁରେ ପାନୀୟ ଜଳ ପହଞ୍ଚି ପାରିଛି ।
ଗ୍ରାମବାସୀ ଏହି କଲୋନୀ ଗୁଡିକୁ ସଂଖ୍ୟା ମାତ୍ରର ପରିଚୟତାକୁ ବଦଳାଇ ପୁନଃ ନାମକରଣ କରିଥିଲେ । କଲୋନୀ ନମ୍ବର 6କୁ ବଦଳାଇ ବୈକୁଣ୍ଠପୁର ନାଁ ଦେଲେ । ନାଁ ବଦଳିଲା ମାତ୍ର ଭାଗ୍ୟ ବଦଳିବାର ଆଶା ମଉଳିଗଲା । ଆଗଭଳି ସାରା ଗାଁ ବିଦ୍ୟାଳୟର ନଳକୂପ ଏକମାତ୍ର ଭରଷା ହୋଇ ରହିଥିଲା । ସରକାରୀ ବିଭାଗ କିଛି ସ୍ଥାନରେ ନଳକୂପ ଖୋକିବାକୁ ଚେଷ୍ଟା କରି ବିଫଳ ହେବା ପରେ ଏକରକମ ଆଶା ଛାଡ଼ିଦେଇଥିଲେ ଗ୍ରାମବାସୀ । କିନ୍ତୁ ଚଳିତବର୍ଷ ଶୋଭା ସଙ୍ଗଠନର ପ୍ରୟାସ ଫଳବତୀ ହୋଇଛି । ନଳକୂପ ଖୋଲାଯାଇ ମୋଟର ପମ୍ପ ଲଗାଇଦିଆଯାଇଛି ।
ଗ୍ରାମବାସୀ ଓ ସଙ୍ଗଠନର ପ୍ରଚେଷ୍ଟାରେ ବର୍ତ୍ତମାନ ଟ୍ରାନ୍ସଫର୍ମର ବଦଳାଯାଇ ଥ୍ରୀ ଫେଜ ଲାଇନ ସଂଯୋଗ କରାଯିବାର କାର୍ଯ୍ୟ ଆରମ୍ଭ ହୋଇଯାଇଛି । ଅଳ୍ପଦିନ ମଧ୍ୟରେ ପିଇବା ପାଣିର ସମସ୍ୟା ଦୂରହେବ ବୋଲି ଗ୍ରାମବାସୀ ଆଶା ବାନ୍ଧିଛନ୍ତି ।
କେନାଲ ପାଣିକୁ ବ୍ୟବହାର କରି ଚାଷବାସ କରିବା ଏହି ବିସ୍ଥାପିତ ଲୋକଙ୍କ ପାଇଁ ଏକ ସ୍ବପ୍ନ ହୋଇ ରହିଯାଇଛି । ତେବେ ଅନ୍ତତଃ ପକ୍ଷେ ପିଇବା ପାଣିର ସୁବିଧା ହୋଇଯାଇଥିବା ଯୋଗୁଁ ଗ୍ରାମବାସୀଙ୍କ ମନରେ ଏକ ନୂତନ ଜୀବନ ପାଇଥିବାର ଆନନ୍ଦ ଭରିଯାଇଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
