କୋରାପୁଟ: ସ୍କୁଲ ପିଲାଙ୍କ ପାଇଁ ସ୍ବତନ୍ତ୍ର ଭାବେ ପାଣି ପିଇବା ପାଇଁ ଘଣ୍ଟି ବାଜୁଛି । ପିଲାମାନେ ନିଜ ନିଜ ଶ୍ରେଣୀଗୃହରୁ ବାହାରିବା ସହ ବାରଣ୍ଡାରେ ରଖାଯାଇଥିବା ପାଣି ବୋତଲରୁ ପାଣି ପିଉଛନ୍ତି । ଏପରି ଦେଖିବାକୁ ମିଳିଛି କୋରାପୁଟ ବ୍ଲକ ଅନ୍ତର୍ଗତ ଦେବୀଘାଟ ସ୍ଥିତ ଜେଇଏଲସି ପ୍ରାଥମିକ ବିଦ୍ୟାଳୟରେ । ବିଦ୍ୟାଳୟରେ ପ୍ରତି ଦୁଇ ପିରିଅଡ଼ ପରେ ବାଜୁଛି ଏହି ବେଲ । ଏହାଦ୍ବାରା ପିଲାମାନଙ୍କ ମଧ୍ୟରେ ଆବଶ୍ୟକ ପରିମାଣର ପାଣି ପିଇବାର ଅଭ୍ୟାସ ହେବା ସହ ଶୃଙ୍ଖଳିତ ଭାବେ କାର୍ଯ୍ୟ ସମ୍ପାଦନ କରିବାର ଦକ୍ଷତା ବୃଦ୍ଧି ପାଉଥିବା ବିଦ୍ୟାଳୟର ପ୍ରଧାନ ଶିକ୍ଷକ ପ୍ରଶାନ୍ତ କୁମାର ପାତ୍ର ଜଣାଇଛନ୍ତି ।
ପିଲାଏ ମଧ୍ୟ ଏହି ନୂତନ ବ୍ୟବସ୍ଥାକୁ ନେଇ ଯେତିକି ଉତ୍ସାହିତ ଏହାର କାର୍ଯ୍ୟକାରିତାକୁ ନେଇ ସେତିକି ଆନନ୍ଦିତ ହୋଇଉଠିଛନ୍ତି । ତେବେ ଏସବୁ ଅବସରପ୍ରାପ୍ତ ଶିକ୍ଷାଅଧିକାରୀ ଶିବଶଙ୍କର ପଟ୍ଟନାୟକଙ୍କ ସହଯୋଗ ଯୋଗୁଁ ସମ୍ଭବ ହୋଇପାରିଛି ବୋଲି ପ୍ରଧାନ ଶିକ୍ଷକ ଜଣାଇଛନ୍ତି । ଶ୍ରୀ ପଟ୍ଟନାୟକ ଗତ କିଛିଦିନ ପୂର୍ବେ ପିଲାଙ୍କ ମଧ୍ୟରେ ପାଣି ପିଇବାକୁ ନେଇ ଉପଯୁକ୍ତ ଅଭ୍ୟାସ ନ ଥିବା ଦେଖି ପ୍ରତ୍ୟେକ ପିଲାଙ୍କୁ ପାଣି ବୋତଲ ଯୋଗାଇଦେଇଥିଲେ । ବର୍ତ୍ତମାନ ପିଲାଏ ଏହି ବୋତଲର ସଦୁପଯୋଗ କରି ଏକ ସୁନ୍ଦର ଅଭ୍ୟାସ ଆରମ୍ଭ କରି ପାରିଥିବା ଶ୍ରୀ ପାତ୍ର ମତ ରଖିଛନ୍ତି ।
କୋରାପୁଟ ଜିଲ୍ଲାରେ ପ୍ରଥମ ଥର ପାଇଁ ଏପରି ଏକ ପଦକ୍ଷେପ ବ୍ୟକ୍ତିଗତ ସହଯୋଗରେ ହୋଇପାରିଥିବା ବେଳେ ଅନ୍ୟ ବିଦ୍ୟାଳୟ ଗୁଡିକ ମଧ୍ୟ ଅନୁରୂପ ଭାବେ କାର୍ଯ୍ୟକ୍ରମ ଆରମ୍ଭ କରିବାର ଆବଶ୍ୟକତା ରହିଛି ବୋଲି ସାଧାରଣରେ ମତ ପ୍ରକାଶ ପାଇଛି ।
କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ
