କୋରାପୁଟ: ସ୍ବାଧୀନତାର ୭୫ ବର୍ଷ ପୂର୍ତ୍ତି ଅବସରରେ ଦେଶ ଅମୃତ ମହୋତ୍ସବ ପାଳନ କରୁଥିବାବେଳେ, ଯାତାୟତ ପାଇଁ ଦୀର୍ଘ ବର୍ଷ ହେବ ସମସ୍ୟା ଭୋଗୁଛନ୍ତି କୋରାପୁଟ ଜିଲ୍ଲାର ୬ଟି ଗ୍ରାମର ଗ୍ରାମବାସୀ । ସମାଧାନ ପାଇଁ ଦୀର୍ଘ ଦିନ ଧରି ଏକ ପୋଲ ଦାବି କରିଆସୁଛନ୍ତି । ଦାବି ଆଧାରରେ ପୋଲ ନିର୍ମାଣ କାର୍ଯ୍ୟ ମଧ୍ୟ ଆରମ୍ଭ ହେଲା, ମାତ୍ର ସଂପୂର୍ଣ୍ଣ ହୋଇପାରିଲା ନାହିଁ । ପ୍ରଶାସନର ଅଣଦେଖା ଓ ଠିକାଦାର କମ୍ପାନୀର ବେପରୁଆ ମନୋଭାବ ପାଇଁ ଅଧାରେ ଅଟକିଛି ଏହି ପୋଲ ନିର୍ମାଣ କାମ । ଅଧାପନ୍ତରିଆ ହୋଇ ପଡିଛି କୋରାପୁଟ ଜିଲ୍ଲାର ଦଶମନ୍ତପୁର ବ୍ଲକ ନନ୍ଦୀଗାଁ ପଞ୍ଚାୟତ କାର୍ଯ୍ୟାଳୟ ନିକଟରୁ ମଧୁବିଶାଲି ଯିବା ବାଟରେ ଥିବା ଚାବରି ନଦୀରେ ତିଆରି ହେଉଥିବା ପୋଲ । ଫଳରେ ନାହିଁ ନଥିବା ସମସ୍ୟା ଭୋଗୁଛନ୍ତି ପ୍ରାୟ ୬ଟି ଗ୍ରାମର ଲୋକେ ।
ଏ ସମସ୍ୟାରୁ ମୁକୁଳିବା ପାଇଁ ନିଜ ଖର୍ଚ୍ଚ ଓ ପରିଶ୍ରମରେ ବାଉଁଶ ପୋଲ ତିଆରି କରିଛନ୍ତି ଗାଁ ଲୋକେ । ଜୀବନକୁ ବିପଦରେ ପକାଇ ଛୋଟଠୁ ବଡ ପର୍ଯ୍ୟନ୍ତ, ଛାତ୍ରଛାତ୍ରୀଙ୍କ ଠାରୁ ଆରମ୍ଭ କରି ଗୁରୁତର ରୋଗୀଙ୍କ ପର୍ଯ୍ୟନ୍ତ ଏହି ଅସ୍ଥାୟୀ ବାଉଁଶ ପୋଲ ଦେଇ ଯାତାୟତ କରୁଛନ୍ତି । ନନ୍ଦୀଗାଁ ପଞ୍ଚାୟତ କାର୍ଯ୍ୟାଳୟ ନିକଟରୁ ମଧୁବିଶାଲି ଯିବା ବାଟରେ ପଡେ ଚାବରି ନଦୀ । ନଦୀର ଆରପଟେ ଥିବା ମଧୁବିଶାଲି, ସଲପଗୁଡ଼ା, ତେତଲିଗୁଡ଼ା, ମାଳତିଗୁଡ଼ା, ଚାକଲି ଓ ଝାବରାପଦରର ଗ୍ରାମବାସୀ ଗତ ପାଞ୍ଚବର୍ଷ ଧରି ଯାତାୟତରେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିଲେ । ପାଞ୍ଚ ବର୍ଷ ପୂର୍ବେ ଗାଁ ଲୋକେ ଏହି ନଦୀର ସ୍ୱଳ୍ପ ଜଳ ପ୍ରବାହିତ ହେଉଥିବା ସ୍ଥାନକୁ ଦେଖି ବର୍ଷ ତମାମ କଷ୍ଟରେ ହେଉ ପଛେ ପାର୍ ହୋଇଯାଉଥିଲେ ।
ତେବେ ଗ୍ରାମବାସୀଙ୍କ ବାରମ୍ବାର ଦାବି ଉପସ୍ଥାପନ କରିବା ପରେ ୨୦୧୭ରେ ଗ୍ରାମ୍ୟ ଉନ୍ନୟନ ବିଭାଗ ଦ୍ଵାରା ଏହି ନଦୀ ଉପରେ ଏକ ୭୬.୦୫ ମିଟର ଲମ୍ବ ବିଶିଷ୍ଟ ଏକ ପୋଲ ନିର୍ମାଣ କରିବା ପାଇଁ ଏନବିସିସି ଠିକାଦାର କମ୍ପାନୀକୁ ଦାୟିତ୍ଵ ଦିଆଯାଇଥିଲା । ସମୁଦାୟ ୨୭୭.୮ ଲକ୍ଷ ଟଙ୍କା ବ୍ୟୟରେ ଏହି ପୋଲ ନିର୍ମାଣ ପାଇଁ ସ୍ଥିର ହୋଇଥିଲା । ନିର୍ମାଣ କାର୍ଯ୍ୟ ୨୦୧୯ ସୁଦ୍ଧା ସଂପୂର୍ଣ୍ଣ କରିବାକୁ ଧାର୍ଯ୍ୟ ହୋଇଥିଲା । ମାତ୍ର ବର୍ଷ ୨୦୨୨ ଶେଷ ହେବାକୁ ବସିଥିଲେ ସୁଦ୍ଧା ପୋଲ ନିର୍ମାଣ ଶେଷ ତ ଦୂରର କଥା ଆରମ୍ଭ ମଧ୍ୟ ହୋଇନାହିଁ । କେବଳ ନଦୀ ଭିତରେ ଗାତ ଖୋଳି ଛାଡି ଦିଆଯାଇଛି । ଠିକାଦାରଙ୍କ ମନମାନି ଓ ସରକାରୀ କଳର ଉଦାସୀନତା ଯୋଗୁଁ ଅନିଶ୍ଚିତତାରେ ଏହି ପୋଲ ନିର୍ମାଣ କାମ । ଫଳରେ ନୀରିହ ଗ୍ରାମବାସୀ ଭାଗ୍ୟକୁ ଆଦରି ସେହି ବିପଦପୂର୍ଣ୍ଣ ପୋଲରେ ପ୍ରତିଦିନ ପାର୍ ହେଉଛନ୍ତି ।
ସମସ୍ୟାର ସମାଧାନ ପାଇଁ ଟଙ୍କା ଆଦାୟ କରି ୧୦ ହଜାର ଟଙ୍କା ଖର୍ଟ୍ଟ କରି କାମଚଳା ଦେଶୀ ବାଉଁଶ ପୋଲଟିଏ ତିଆରି କରିଛନ୍ତି ଗ୍ରାମବାସୀ । ପାଣି ମଧ୍ୟରେ ମାଟି ଜମା କରିଦେବା ପରେ ଆଉ କାର୍ଯ୍ୟ ଆଗକୁ ବଢି ପାରୁନାହିଁ । ଫଳରେ ନଦୀରେ ପ୍ରବାହିତ ହେଉଥିବା ଜଳର ସ୍ରୋତ ଦିଗ ବଦଳାଇବା ସହ ଟିକିଏ ବର୍ଷା ହେଲେ ଲୋକଙ୍କ ଯାତାୟାତରେ ବାଧା ସୃଷ୍ଟି ହେଉଥିବା ଗ୍ରାମବାସୀ ଅଭିଯୋଗ କରିଛନ୍ତି । ସମସ୍ତ ୬ଟି ଗାଁର ରୋଗୀଙ୍କୁ ହସ୍ପିଟାଲ ନେବା ସମୟରେ ନଦୀ ପାର କରି ହେଉନଥିବା ଯୋଗୁଁ ଏହି ପାଞ୍ଚ ବର୍ଷରେ କିଛି ରୋଗୀଙ୍କ ଜୀବନ ମଧ୍ୟ ଯାଇଛି । ଖାଲି ସ୍ବାସ୍ଥ୍ୟ ନୁହେଁ ଶିକ୍ଷା ମଧ୍ୟ ପ୍ରଭାବିତ ହୋଇଛି ।
ଠିକାଦାର କମ୍ପାନୀ ଓ ଜିଲ୍ଲା ପ୍ରଶାସନ ଅଣଦେଖା କରିଦେଇଥିବା ମଧୁବିଶାଲି ଗାଁର ଯୁବକ କୁମୁନାଥ ନାୟକ ଅଭିଯୋଗ କରିଛନ୍ତି । ଗାଁର ଚାରିପାଖେ ପାଣି ରହିଥିବା ଯୋଗୁଁ ଗାଁ ପ୍ରାଥମିକ ବିଦ୍ୟାଳୟର ଶିକ୍ଷକ ମଧ୍ୟ ବର୍ଷକୁ ଚାରିମାସ ପାଣି ବଢୁଥିବା ଆଳ ଦେଖାଇ ଆସୁନଥିବା ଗ୍ରାମବାସୀ ପତି ଗୌଡ଼ ଜଣାଇଛନ୍ତି । ତେବେ ଏସବୁ ଅସୁବିଧା ଓ ପ୍ରଶାସନିକ ଅଣଦେଖାକୁ ସହ୍ୟ କରିନପାରି ନଦୀ ଆର ପାଖରେ ଥିବା ଗାଁ ଗୁଡ଼ିକର ଲୋକମାନେ ନିଜ ନିଜ ମଧ୍ୟରେ ଚାନ୍ଦା ଉଠାଇ ଅର୍ଥ ଏକାଠି କରିବାସହ ଶ୍ରମଦାନ କରି ନଦୀ ଉପରେ ବାଉଁଶ ଓ କାଠରେ ଏକ ଅସ୍ଥାୟୀ ପୋଲ ନିର୍ମାଣ କରିବାକୁ ବାଧ୍ୟ ହୋଇଥିବା କୁମ ଗୌଡ଼ ଜଣାଇଛନ୍ତି ।
ତେବେ ଟିକେ ବଡ ଧରଣର ବର୍ଷା ହେଲେ ଗତ କିଛିଦିନ ମଧ୍ୟରେ ନଦୀ ପାଣି ପୋଲଟିକୁ ଭସାଇ ନେଉଥିବା ଗ୍ରାମବାସୀ ଜଣାଇଛନ୍ତି । ବର୍ତ୍ତମାନ ପୁଣିଥରେ ନୂତନ ଭାବେ ଏକ ପୋଲ ନିର୍ମାଣ କରିଥିଲେ ମଧ୍ୟ, ଏହାର ସ୍ଥାୟୀତ୍ବ ଉପରେ ଗ୍ରାମବାସୀ ବିଶ୍ୱାସ କରିପାରିନାହାନ୍ତି । ସ୍ଥାୟୀ ପୋଲ ପାଇଁ ସରକାରଙ୍କ ପାଖରେ ପୁଣିଥରେ ନେହୁରା ହେବା ଛଡ଼ା ଆଉ କିଛି ବାଟ ନଥିବା ଗ୍ରାମବାସୀ କହିଛନ୍ତି ଓ ତୁରନ୍ତ ପୋଲ କାମ ଶେଷ କରିବାକୁ ଦାବି କରିଛନ୍ତି। ଅନ୍ୟପଟେ ରାଜ୍ୟର ବିଭିନ୍ନ ଜିଲ୍ଲାରେ ବିଜୁ ସେତୁ ନିର୍ମାଣ କରି ବାଃ ବାଃ ନେଉଥିବା ସରକାରଙ୍କ ଶୁଭଦୃଷ୍ଟି ଏହି ଅଞ୍ଚଳର ଲୋକଙ୍କ ଉପରେ କେବେ ପଡିବ ତାକୁ ହିଁ ଅପେକ୍ଷା । ଏ ସଂକ୍ରାନ୍ତରେ ଠିକାଦାର ସଂସ୍ଥା କିମ୍ବା ବିଭାଗୀୟ ଅଧିକାରୀଙ୍କ ପ୍ରତିକ୍ରିୟା ମିଳିପାରିନାହିଁ ।
ଇଟିଭି ଭାରତ, କୋରାପୁଟ
