କୋରାପୁଟ: ଗାଈ ଗୋରୁଙ୍କୁ ହୋଇଛି ଫାଟୁଆ ରୋଗ ଆଉ ଏନେଇ ଚିନ୍ତାରେ ଗ୍ରାମବାସୀ । ସରକାରଙ୍କ ନିୟମାନୁସାରେ ଗାଈ ଗୋରୁଙ୍କୁ ପ୍ରତି ଛଅ ମାସରେ ଥରେ ଫାଟୁଆ ରୋଗର ଭ୍ୟାକ୍ସିନ ଦେବା ନିତାନ୍ତ ଆବଶ୍ୟକ । କିନ୍ତୁ ୨୦୨୦ ମସିହାରୁ ଏ ଯାଏଁ ସରକାରଙ୍କ ତରଫରୁ ଜିଲ୍ଲାକୁ ଭ୍ୟାକ୍ସିନ ଯୋଗାଇ ଦିଆଯାଇନଥିବା ନେଇ କୋରାପୁଟ ବ୍ଲକ ଅଧିନ ମହାଦେଇପୁଟ ପଞ୍ଚାୟତର ପ୍ରାଣୀଧନ ନିରୀକ୍ଷକ ବାବୁଲି ଚନ୍ଦ୍ର ସାମନ୍ତରାୟ ସୂଚନା ଦେଇଛନ୍ତି ।
ସୂଚନାନୁସାରେ ବର୍ଷା ଦିନରେ ଚାଷ କାର୍ଯ୍ୟ ଲାଗି ରହୁଥିବାରୁ ତା ପୂର୍ବରୁ ଗାଈଗୋରୁଙ୍କୁ ଟୀକାକରଣ ହୋଇଥାଏ କିନ୍ତୁ ବିଡମ୍ବନାର ବିଷୟ ସଠିକ୍ ସମୟରେ ଭାକସିନ ଦିଆଯାଇ ନଥିବାରୁ ଏବେ ମହାଦେଇପୁଟ ପଞ୍ଚାୟତରେ ଫାଟୁଆ ରୋଗ ବ୍ୟାପକ ହେବାରେ ଲାଗିଛି ।
ଏବେ ଚାଷ କାର୍ଯ୍ୟ ଜାରି ରହିଥିବାରୁ ଗାଈଗୋରୁ ଜମିକୁ ଯାଇନପାରି ଗୁହାଳରେ ଓ ପଡ଼ିଆରେ ବସି ରହୁଥିବା ଯୋଗୁଁ ଚାଷୀ ଚିନ୍ତାରେ ରହିଥିବାବେଳେ କିଭଳି ଏହି ରୋଗ ଅନ୍ୟ ଗାଁକୁ ନ ବ୍ୟାପିବ, ସେନେଇ ଆତଙ୍କିତ ହୋଇ ପଡିଛନ୍ତି ଗ୍ରାମବାସୀ । ଏନେଇ ସରକାର ତୁରନ୍ତ ଆବଶ୍ୟକୀୟ ପଦକ୍ଷେପ ଗ୍ରହଣ କରିବାକୁ ଅଞ୍ଚଳବାସୀ ଦାବି କରିଛନ୍ତି ।
କୋରାପୁଟରୁ ସିଏଚ୍ ଶାନ୍ତାକାର, ଇଟିଭି ଭାରତ
