କୋରାପୁଟ: ଦୁଇ ନିର୍ଯାତିତ ନାବାଳିକାକୁ ଉଦ୍ଧାର କଲା ଜିଲ୍ଲା ଶିଶୁ ସୁରକ୍ଷା ୟୁନିଟ (District Child Protection Unit )। କୋଟପାଡର ଜନୈକ ପାଦ୍ରୀଙ୍କ ଘରୁ ଦୁଇଜଣ ଝିଅଙ୍କୁ ଚାଇଲଡ ଲାଇନ ଓ ଜିଲ୍ଲା ଶିଶୁ ସୁରକ୍ଷା କାର୍ଯ୍ୟାଳୟ ପକ୍ଷରୁ ଉଦ୍ଧାର କରାଯାଇଛି ।
ଜିଲ୍ଲା ଶିଶୁ ସୁରକ୍ଷା ଅଧିକାରୀ ରାଜଶ୍ରୀ ଦାସଙ୍କ କହିବା ଅନୁଯାୟୀ କୋରାପୁଟ ଜିଲ୍ଲା କୋଟପାଡର ମିସନ କମ୍ପାଉଣ୍ଡ ଅଞ୍ଚଳର ପାଦ୍ରୀ ଜଣକ ବେଆଇନ ଭାବେ ଦୁଇ ଝିଅଙ୍କୁ ଅନେକ ବର୍ଷ ଘରେ ରଖିଥିଲେ । ସେମାନଙ୍କୁ ପୋଷ୍ୟ ସନ୍ତାନ ଭାବେ ରଖି ବିଭିନ୍ନ କାମରେ ନିୟୋଜିତ କରୁଥିଲେ । କାମ କରାଇବା ସହ ତାଙ୍କ ପରିବାରର ଲୋକେ ସେହି ଦୁଇ ଝିଅଙ୍କୁ ଅକଥନୀୟ ନିର୍ଯାତନା ଦେଉଥିବା ପାଖ ପଡୋଶୀ ଅଭିଯୋଗ କରିଛନ୍ତି । ଏନେଇ ଜିଲ୍ଲା ଚାଇଲଡ଼ ଲାଇନକୁ ଖବର ଦେଇଥିଲେ।
ଅଭିଯୋଗକୁ ଆଧାର କରି ଚାଇଲଡ଼ ଲାଇନ ଓ ଡିସିପିଓଙ୍କ ଟିମ ଘଟଣାସ୍ଥଳରେ ପହଞ୍ଚି ଦୁଇ ଝିଅଙ୍କୁ ଉଦ୍ଧାର କରିଥିଲେ। ବର୍ତମାନ ସେହି ଦୁଇ ଝିଅଙ୍କୁ ଓପେନ ଶେଲଟର ହୋମରେ (Open Shelter Home) ସୁରକ୍ଷିତ ଭାବେ ରଖାଯାଇଛି । ସେମାନଙ୍କ ସହିତ ବିସ୍ତୃତ କଥାବାର୍ତ୍ତା କରାଯାଉଛି ଓ ଶିଶୁ ମଙ୍ଗଳ କମିଟି ପାଖରେ ସେମାନଙ୍କୁ ଉପସ୍ଥାପନ କରାଯିବ ବୋଲି ଡିସିପିଓ କହିଛନ୍ତି ।
କୋରାପୁଟରୁ ସିଏଚ ଶାନ୍ତାକାର,ଇଟିଭି ଭାରତ
