କୋରାପୁଟ: ପ୍ରକୃତି ସହ ନିରନ୍ତର ଭାବେ ଜଡ଼ିତ ରହିଥିବା ଆଦିବାସୀ ଭଗବାନଙ୍କ ପ୍ରଥମ ସନ୍ତାନ ବୋଲି ଓଡିଶା କେନ୍ଦ୍ରୀୟ ବିଶ୍ୱ ବିଦ୍ୟାଳୟରେ ଆୟୋଜିତ ଏକ ଆଲୋଚନା ଚକ୍ରରେ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ମୁଖ୍ୟ ଅତିଥି ଭାବେ ଯୋଗ ଦେଇ ମତବ୍ୟକ୍ତ କରିଛନ୍ତି । ଭାରତର ସ୍ଵାଧୀନତା ସଂଗ୍ରାମରେ ଆଦିବାସୀଙ୍କ ଭୂମିକା ସମ୍ପର୍କରେ ଚର୍ଚ୍ଚାରେ ଭାଗ ନେଇ ଗଣେଶି ଲାଲ୍ ଶହୀଦ ଲକ୍ଷ୍ମଣ ନାୟକଙ୍କ ସମେତ କୋରାପୁଟ ଅଞ୍ଚଳର ଅନେକ ଆଦିବାସୀ ଯୋଦ୍ଧାଙ୍କ ଅବଦାନ ଅତୁଳନୀୟ ବୋଲି କହିଛନ୍ତି । ପ୍ରକୃତି ସହ ଆଦିବାସୀଙ୍କ ସମ୍ପର୍କ ସମାଜ ପାଇଁ ଏକ ଉଦାହରଣ ହୋଇରହିବ ।
ରାଜ୍ୟପାଳ ପ୍ରଫେସର ଗଣେଶୀ ଲାଲ କହିଛନ୍ତି, "ଓଡିଶା ବିଶ୍ବର ଏମିତି ଏକ ରାଜ୍ୟ ଯିଏ ରଜ ଉତ୍ସବକୁ ପାଳନ କରିଥାଏ । ଆଦି ଶକ୍ତି ସୃଷ୍ଟିର ସମସ୍ତ ଜିନିଷକୁ ତଦାରଖ କରିଛି । ପରେ ଅନନ୍ୟ ସୃଷ୍ଟି ମଣିଷକୁ ତଦାରଖ କରିଛି । ମଣିଷକୁ ଦେଖିବା ପରେ ଆଦି ଶକ୍ତି ମନରେ ଦୁଇଟି କଥା ଆସିଥିଲା । ପ୍ରଥମେ ସିଏ ଆଖି ଖୋଲିଲେ ଏବଂ ଏକ ସ୍ମିତ ହସ ରଖିଥିଲେ । ପରେ ଆଦି ଶକ୍ତି ମୁହଁ ଖୋଲି ଭଗବାନଙ୍କୁ ଧନ୍ୟବାଦ କହିଥିଲେ । ଏହା କହିବାର ଅର୍ଥ ଏହି ଧନ୍ୟବାଦ ଶବ୍ଦ ଏବଂ ଏହି ସ୍ମିତ ହସ ଏହା ଆଜିର ସମାଜରେ ଲୁପ୍ତ ହୋଇଗଲାଣି । ଆଜି ପୁରା ବିଶ୍ବ ଆବଦ୍ଧ ହୋଇଯାଇଛି । ହେଲେ ଆଦିଶକ୍ତି ବିଶ୍ବ ପାଇଁ ଯେଉଁ ମଣିଷ ବନେଇଥିଲେ ଏହି ମଣିଷ ମାନେ ପ୍ରକୃତିର ଥିଲେ, ପ୍ରକୃତି ଦ୍ବାରା ଥିଲେ, ସେଥିପାଇଁ ସେମାନେ ପ୍ରକୃତିରେ ବସବାସ କରନ୍ତି ଏବଂ ପ୍ରକୃତି ସହିତ ବସବାସ କରନ୍ତି । ସେମାନେ ପ୍ରକୃତି ସହିତ ଓତଃପ୍ରୋତ ଭାବରେ ଜଡିତ । ଯାହାକୁ ଦୁନିଆ ଟ୍ରାଇବଲ କହୁଛି ସେମାନେ ଟ୍ରାଇବଲ ନୁହଁନ୍ତି ସେମାନେ ଆଦି ଶକ୍ତିର ପ୍ରଥମ ସନ୍ତାନ । ଏକଥା ମଧ୍ୟ ଦେଶର ପ୍ରଧାନମନ୍ତ୍ରୀ ବାରମ୍ବାର କହିଛନ୍ତି ।"
ଶନିବାର ରାଜ୍ୟପାଳ ଦୁଇଦିନିଆ କୋରାପୁଟ ଗସ୍ତରେ ଆସିଛନ୍ତି । ଆଜି କୁନ୍ଦୁରା ଠାରେ ଦୁରୁଆ ଆଦିବାସୀ ମହିଳାଙ୍କ କାର୍ଯ୍ୟକ୍ରମରେ ଯୋଗ ଦେବା ସହ ଜୟପୁରରେ ଛାତ୍ରଛାତ୍ରୀଙ୍କ ମଧ୍ୟରେ ଆୟୋଜିତ ହେଉଥିବା ରାଜ୍ୟସ୍ତରୀୟ ପ୍ରତିଯୋଗିତାକୁ ଦେଖିବାର କାର୍ଯ୍ୟକ୍ରମ ରହିଛି । ଏହା ପରେ କୋରାପୁଟ ଜିଲ୍ଲାସ୍ତରୀୟ ଅଧିକାରୀଙ୍କ ସହ ଆଲୋଚନା କରି ରାଜ୍ୟପାଳ ରାୟଗଡ଼ା ଅଭିମୁଖେ ଯାତ୍ରା କରିବାର କାର୍ଯ୍ୟସୂଚୀ ରହିଛି ।
ଇଟିଭି ଭାରତ, କୋରାପୁଟ
