କୋରାପୁଟ: ତିଳୋତ୍ତମାଙ୍କ ଆଖିରୁ ଏତେ ଲୁହ ଝରି ଚାଲିଛି ଯେ ବନ୍ଦ ହେବାର ନାଁ ନେଉନାହିଁ । କୋରାପୁଟ ବ୍ଲକର ମହାଦେଇପୁଟ ପଞ୍ଚାୟତ ଅନ୍ତର୍ଗତ ପଣସପୁଟ ବାସିନ୍ଦା ତିଳୋତ୍ତମା । ପିଲାଟି ବେଳୁ ତିଳୋତ୍ତମାଙ୍କ ଡାହାଣ ଗାଲରେ ଅସ୍ବାଭାବିକ ଭାବେ ଚର୍ମ ବଢି ଝୁଲିପଡୁଥିବା ଯୋଗୁଁ ତାଙ୍କ ସ୍ବପ୍ନ ଏବେ ଅଧୁରା ।
ତିଳୋତ୍ତମାଙ୍କ ପାଇଁ ନିଜ ଗାଁରେ ତାଙ୍କ ବୟସର ଅନ୍ୟ ଝିଅଙ୍କ ଭଳି ମୁକ୍ତ ଆକାଶ ତଳେ ଖେଳକୁଦ କରିବା ସ୍ବପ୍ନ ଭାବେ ରହିଗଲା । ଘରର ଆର୍ଥିକ ପରିସ୍ଥିତି ଠିକ ନଥିବା ଯୋଗୁଁ ଡାକ୍ତରଙ୍କ ପରାମର୍ଶ ଅନୁଯାୟୀ ଅସ୍ତ୍ରୋପଚାର କରାଇବା ସମ୍ଭବ ହୋଇପାରିନଥିବା ତିଳୋତ୍ତମା ଜଣାଇଛନ୍ତି ।
ପିଲାଟି ବେଳୁ ଛୋଟମୋଟ କାମ କରି ଘର ଚଳାଇବାରେ ନିଜ ସହଯୋଗ ବାଣ୍ଟି ଚାଲିଛନ୍ତି ତିଳୋତ୍ତମା । ଗତ ପଚିଶି ବର୍ଷ ଧରି ନିଜ ଚୁନିରେ ମୁହଁକୁ ଘୋଡାଇ ବାହ୍ୟ ଲଜ୍ଜାରୁ ନିଜକୁ ବଞ୍ଚାଇ ଚାଲିଛନ୍ତି । ହେଲେ ବଢିଚାଲିଥିବା ମୋଟା ଚର୍ମ ଯୋଗୁଁ ବିବାହ ଯୋଗ୍ୟ ବୟସ ଉପନ୍ନୀତ ହୋଇଥିଲେ ହେଁ ହାତରୁ ଦୁଇ ହାତ ହୋଇପାରୁନାହାଁନ୍ତି ।
ତେବେ ତିଳୋତ୍ତମାଙ୍କ ଜୀବନର ଏହି କରୁଣ କାହାଣୀ ସମ୍ପର୍କରେ ଜାଣିବା ପରେ ତାଙ୍କ ଚିକିତ୍ସା ପାଇଁ ସମସ୍ତ ପଦକ୍ଷେପ ନିଆଯିବ ବୋଲି ଜିଲ୍ଲା ସାମାଜିକ ସୁରକ୍ଷା ଅଧିକାରୀ ସୀମାଞ୍ଚଳ ମହାପାତ୍ର ପ୍ରତିଶ୍ରୁତି ଦେଇଛନ୍ତି ।
କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ
