କୋରାପୁଟ: କୁନ୍ଦୁରା ବ୍ଲକ ସଦର ମହକୁମାଠାରେ ଭାରତୀୟ ଷ୍ଟେଟବ୍ୟାଙ୍କର ଏକ ଶାଖା ପ୍ରତିଷ୍ଠା ପାଇଁ ସଚେତନ ନାଗରିକ ମଞ୍ଚ ପକ୍ଷରୁ ବିଡିଓ ସ୍ନେହପ୍ରଭା ମାଝିଙ୍କ ଜରିଆରେ ଜିଲ୍ଲାପାଳଙ୍କୁ ଦାବି ପତ୍ର ପ୍ରଦାନ କରାଯାଇଛି । ତେବେ ଟଙ୍କା ଦେଣନେଣ ପାଇଁ ଅଞ୍ଚଳବାସୀ ଏଠାରୁ 25 କିଲୋମିଟର ଦୂର ଜୟପୁର ସହରର ଷ୍ଟେଟବ୍ୟାଙ୍କ ଉପରେ ନିର୍ଭରଶୀଳ ହୋଇଥାନ୍ତି ।
କୋରାପୁଟ ଜିଲ୍ଲା ସଦର ମହକୁମାଠାରୁ କୁନ୍ଦୁରା ବ୍ଲକର ଦୂରତା ପ୍ରାୟ 60 କିଲୋମିଟର । ଏହା ଏକ ଆଦିବାସୀ ବହୁଳ ଅଞ୍ଚଳ ହୋଇଥିବାବେଳେ ବ୍ଲକର ଗରିବ ହିତାଧିକାରୀ ସରକାରୀ ଯୋଜନାର ସୁଫଳ ଲାଭ ପାଇଁ 25 କିଲୋମିଟର ଦୂର ଜୟପୁର ସହରର ଷ୍ଟେଟବ୍ୟାଙ୍କ ଯିବାକୁ ବାଧ୍ୟ ହେଉଛନ୍ତି । ଏହାଫଳରେ ସମସ୍ତଙ୍କ ଯାତାୟତରେ ଅସୁବିଧା ସହ ଅର୍ଥ ଓ ସମୟ ଅପଚୟ ହେଉଥିବା ଏହି ଦାବି ପତ୍ରରେ ଜଣାଇଛନ୍ତି ।
ପୂର୍ବରୁ 2012-13ରେ ଏଠାରେ ଏକ ଷ୍ଟେଟବ୍ୟାଙ୍କ ପ୍ରତିଷ୍ଠା ପାଇଁ କୁଆଡେ କର୍ମଚାରୀ ନିଯୁକ୍ତି ହୋଇଥିଲେ । ହେଲେ କୌଣସି କାରଣବଶତଃ ବ୍ୟାଙ୍କଟି କୁନ୍ଦୁରାରେ ସ୍ଥାପନ କରାନଯାଇ ଏଠାରୁ 28 କିଲୋମିଟର ଦୂର ବୈପାରୀଗୁଡାରେ ସ୍ଥାପନ କରାଯାଇଥିବା ଅଭିଯୋଗ ହୋଇଛି । ଏ ସମ୍ପର୍କରେ ଜିଲ୍ଲାପାଳଙ୍କ ଅନେକ ଥର ଦୃଷ୍ଟି ଆକର୍ଷଣ କରାଯାଇଥିଲେ ମଧ୍ୟ କୌଣସି ସୁଫଳ ମିଳିପାରିନାହିଁ । ଏନେଇ କୁନ୍ଦୁରାରେ ଷ୍ଟେଟବ୍ୟାଙ୍କର ଏକ ଶାଖା ସ୍ଥାପନ ପାଇଁ ସଚେତନ ନାଗରିକ ମଞ୍ଚ ପକ୍ଷରୁ ଜିଲ୍ଲାପାଳଙ୍କୁ ପୂନର୍ବାର ଦାବିପତ୍ର ପ୍ରଦାନ କରାଯାଇଛି । ତେବେ ଅଞ୍ଚଳବାସୀଙ୍କ ସମସ୍ୟାକୁ ହୃଦୟଙ୍ଗମ କରି ଆଗାମୀ ଦିନରେ ଏଠାରେ ବ୍ୟାଙ୍କ ନିର୍ମାଣ କରାଯାଉଛି କି ନାହିଁ ତାହା ଦେଖିବାକୁ ବାକି ରହିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
