କୋରାପୁଟ: ଚୋରି ଓ ଡକାୟତି ମାମଲାରେ 2ଜଣ ଡକାୟତଙ୍କୁ ଗିରଫ କଲା ପୋଲିସ । କୋରାପୁଟ ସହରରେ ଗତ କିଛିଦିନ ଧରି ଚାଲିଥିବା ଚୋରି ଓ ଡକାୟତିର ମୁଖ୍ୟ ଅଭିଯୁକ୍ତ ଟିକିରା ସାହିର କାର୍ତ୍ତିକ ଖିଲ ଓ ପୁରୁଣା କୋରାପୁଟରେ ରହୁଥିବା ତାର ସହଯୋଗୀ ଆଦିତ୍ୟ ଖରାକୁ କୋରାପୁଟ ଟାଉନଥାନା ପୋଲିସ ଗିରଫ କରିଛି ।
ସେମାନଙ୍କ ନିକଟରୁ 4ଟି ସୁନା ଚେନ, ତିନି ହଳ ସୁନାର କାନ ଫୁଲ , ତିନୋଟି ସୁନାମୁଦି , 8ଟି ମୋବାଇଲ ଫୋନ, ଗୋଟାଏ ଲାପଟପ ଓ ଟାବଲେଟ ସହ ଚୋରି କରିବା ପାଇଁ ବ୍ୟବହାର କରାଯାଉଥିବା ବିଭିନ୍ନ ଅସ୍ତ୍ରଶସ୍ତ୍ର ଜବତ କରାଯାଇଛି ।
ଏସଡିପିଓ ଗୁଣନିଧି ନାୟକଙ୍କ କହିବାନୁଯାୟୀ, ଗତ 2 ମାସ ମଧ୍ୟରେ ସହରରେ ସଂଙ୍ଗଠିତ ହୋଇଥିବା 4ଟି ଗମ୍ଭୀର ଚୋରି ଓ ଡକାୟତି ମାମଲାରେ ସେମାନେ ଜଡିତ ଅଛନ୍ତି । ଲୁଟ କରିଥିବା ଲାପଟପକୁ ବିକ୍ରି କରିବା ପାଇଁ ଚେଷ୍ଟା କରୁଥିବା ବେଳେ ଖବର ପାଇ ପୋଲିସ ସେମାନଙ୍କୁ ଗିରଫ କରିଥିଲା ।
କାର୍ତିକ ପୂର୍ବରୁ ଏକ ଡକାୟତି ମାମଲାରେ ଜେଲରେ ରହି କିଛିମାସ ପୂର୍ବରୁ ମୁକୁଳିଥିବା ବେଳେ ପୁଣିଥରେ ନିଜ ପୂର୍ବ ଅଭ୍ୟାସକୁ ଦୋହରାଇଥିବା ଶ୍ରୀ ମଲ୍ଲିକ ଜଣାଇଛନ୍ତି । ଆଜି ଉଭୟ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଦିଆଯାଇଥିବା ସେ ପ୍ରକାଶ କରିଛନ୍ତି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
