କୋରାପୁଟ: ଲକ୍ଷ୍ମୀ ଯୋଜନାକୁ ବିରୋଧ କରି କୋରାପୁଟରେ ବସ ଚଳାଚଳ ବନ୍ଦ କଲା । 24 ଘଣ୍ଟିଆ ବସ ଚଲାଚଳ ବନ୍ଦ ଡାକରା ଦେଇଛି ଘରୋଇ ବସ ମାଲିକ ସଂଘ । ଆଜି ସକାଳଠାରୁ ବସ ଚଳାଚଳ ବନ୍ଦ ହୋଇଥିବା ବେଳେ ଆସନ୍ତାକାଲି ସକାଳେ ଶେଷ ହେବ। ଫଳରେ ବସଷ୍ଟାଣ୍ଡରେ ହନ୍ତସନ୍ତ ହେଉଛନ୍ତି ଯାତ୍ରୀ । କୋରାପୁଟ ଜିଲ୍ଲାର ୧୪ଟି ବ୍ଲକକୁ ଘରୋଇ ବସ ଚଳାଚଳ ଠପ୍ ହୋଇଛି । ୨୦୦ରୁ ଊର୍ଦ୍ଧ୍ୱ ଘରୋଇ ବସ ୭୫ଟି ରୁଟ୍ରେ ଚଳାଚଳ ବନ୍ଦ କରିଛି ।
ଜିଲ୍ଲାରେ ଅଧିକାଂଶ ରାସ୍ତାରେ ଘରୋଇ ବସ ଚଳାଚଳ କରୁଛି । ବସ ଚଳାଚଳ ବନ୍ଦ ରହିଥିବା ଯୋଗୁଁ ଯାତ୍ରୀମାନେ ବହୁ ଅସୁବିଧାର ସମୁଖୀନ ହୋଇଛନ୍ତି । ବିଭିନ୍ନ ସ୍ଥାନକୁ ଯିବାକୁ ଥିବା ଯାତ୍ରୀମାନେ କୋରାପୁଟ ବସ୍ଷ୍ଟାଣ୍ଡରେ ଅଟକି ରହିଛନ୍ତି । ଲକ୍ଷ୍ମୀ ବସ୍ ସେବା ଯୋଜନାରେ ଘରୋଇ ବସ ଗୁଡିକୁ ସାମିଲ କରିବା ଦାବିରେ ବସ୍ ଚଲାଚଳ ବନ୍ଦ କରିଛି ବସ ମାଲିକ ସଂଘ । ସରକାର ଲକ୍ଷ୍ମୀ ବସ ସେବା ଆରମ୍ଭ କରି ଘରୋଇ ବସ ମାଲିକ ସଂଘ ଓ କର୍ମଚାରୀଙ୍କ ଜୀବନ ଜୀବିକାକୁ ବୁଡାଇଦେବାକୁ ଉଦ୍ୟମ କରୁଥିବା ଅଭିଯୋଗ ହୋଇଛି । ବସ ମାଲିକ ଓ କର୍ମଚାରୀଙ୍କ ସ୍ବାର୍ଥ ପ୍ରତି ଦୃଷ୍ଟି ଦେବାକୁ କୋରାପୁଟ ଘରୋଇ ବସ ମାଲିକ ସଂଘ ଦାବି କରିଛି ।
ଏହା ମଧ୍ୟ ପଢନ୍ତୁ-ଲକ୍ଷ୍ମୀ ଯୋଜନାକୁ ବିରୋଧ, ନବରଙ୍ଗପୁରରେ ୨୪ ଘଣ୍ଟିଆ ବସ ଚଳାଚଳ ବନ୍ଦ
ବସ ଚଳାଚଳ ବନ୍ଦ ରହିଥିବା ବେଳେ ବସ୍ ଷ୍ଟାଣ୍ଡ ଖାଁ ଖାଁ ହୋଇ ପଡ଼ିଛି । କିଛି ଅଟୋ ହିଁ ବସ୍ ଷ୍ଟାଣ୍ଡରେ ରହିଥିବା ଦେଖିବାକୁ ମିଳିଛି । ରାଜଧାନୀରୁ ପ୍ରତ୍ୟେକ ପଞ୍ଚାୟତକୁ ବସ ଗଡ଼ିବା ନେଇ ରାଜ୍ୟ ସରକାର ଲକ୍ଷ୍ମୀ ଯୋଜନା ଆରମ୍ଭ କରିଛନ୍ତି । ବର୍ତ୍ତମାନ ବସ୍ଗୁଡିକ କୋରାପୁଟ ଜିଲ୍ଲାରେ ପହଞ୍ଚିଥିବା ବେଳେ ଚଳାଚଳ ଆରମ୍ଭ ହୋଇନାହିଁ । ବିନା ଆଲୋଚନାରେ ସରକାରଙ୍କ ଦ୍ଵାରା ଲକ୍ଷ୍ମୀ ଯୋଜନା କାର୍ଯ୍ୟକାରିତା ପ୍ରତିବାଦରେ ଘରୋଇ ବସ ମାଲିକ ସଂଘ ଆଜି ୨୪ ଘଣ୍ଟିଆ ବସ ଚଳାଚଳ ବନ୍ଦ କରିଛି । ଆଜି ନବରଙ୍ଗପୁର ଜିଲ୍ଲାରେ ମଧ୍ୟ ବସଚଳାଚଳ ବନ୍ଦ ରହିଛି । ବସ୍ ମାଲିକ ସଂଘର ବିନା ସହମତିରେ ରାଜଧାନୀରୁ ପ୍ରତ୍ୟେକ ପଞ୍ଚାୟତକୁ ବସ୍ ସେବା ଆରମ୍ଭ ହୋଇଥିବାରୁ ଏହାକୁ ବିରୋଧ କରାଯାଇଛି ।
ଇଟିଭି ଭାରତ, କୋରାପୁଟ
