କୋରାପୁଟ: ଆଜି ପବିତ୍ର ଜାଗର ବା ମହାଶିବରାତ୍ରୀ । ଭୋଳାଶଙ୍କରଙ୍କ ଉପାସନା କରି ତାଙ୍କୁ ପ୍ରସନ୍ନ କରିବା ପାଇଁ ଆଜି ଶ୍ରେଷ୍ଠ ଦିନ । କୋରାପୁଟରେ ରହିଛି ପ୍ରସିଦ୍ଧ ଶୈବପୀଠ ଗୁପ୍ତେଶ୍ବର । ଆଉ ଶିବରାତ୍ରୀର ପୂର୍ବଦିନ ଏଠାରେ ଶାବର ଶ୍ରୀକ୍ଷେତ୍ର କୋରାପୁଟ ଶ୍ରୀଜଗନ୍ନାଥ ମନ୍ଦିର ପରିଚାଳନା ସଂସ୍ଥା ଦ୍ବାରା ପତିତପାବନ ମନ୍ଦିର ପ୍ରତିଷ୍ଠା କରାଯାଇଛି ।
ପ୍ରତି ଶିବରାତ୍ରିର ମଧ୍ୟରାତ୍ରୀରେ ଗୁପ୍ତେଶ୍ଵର ପୀଠକୁ କୋରାପୁଟରୁ ଶ୍ରୀଜଗନ୍ନାଥଙ୍କ ଚଳନ୍ତି ପ୍ରତିମାକୁ ନେଇ ଭକ୍ତ ଏକ ଉତ୍ସବ ମୁଖରିତ ପରିବେଶରେ ପଟୁଆରରେ ନେଇଆସନ୍ତି । ଏହି ମହାସମାରୋହରେ ହରିହର ଭେଟ ଅନୁଷ୍ଠିତ ହୋଇଥାଏ । ଏହି ଦୃଶ୍ୟକୁ ଦେଖିବା ଲାଗି ହଜାର ହଜାର ଭକ୍ତଙ୍କ ସମାଗମ ହୋଇଥାନ୍ତି ।
ଭକ୍ତଙ୍କ ଅନୁରୋଧକ୍ରମେ ଗୁପ୍ତେଶ୍ଵର ମନ୍ଦିର ପାଦଦେଶରେ ପତିତପାବନ ମନ୍ଦିର ପ୍ରତିଷ୍ଠା କରିବା ପାଇଁ ନିଷ୍ପତ୍ତି ନିଆଯାଇଥିଲା । ଏହି ମନ୍ଦିର ପ୍ରତିଷ୍ଠା ହେବା ଫଳରେ ମହାଶିବରାତ୍ରି ଅବସରରେ ହରିହର ଭେଟ ସମ୍ପନ୍ନ କରିବାରେ ସୁବିଧା ହେବ । ଏପରି ସୂଚନା ଦେଇଛନ୍ତି କୋରାପୁଟ ଶ୍ରୀଜଗନ୍ନାଥ ମନ୍ଦିର ସମ୍ପାଦକ ଗଦାଧର ପରିଡା ।
ଅନ୍ୟଦିନରେ ମଧ୍ୟ ଭକ୍ତ ଉଭୟ ହର ଓ ହରିଙ୍କୁ ଗୋଟାଏ ପାହାଡରେ ଦର୍ଶନ କରିବାର ସୁଯୋଗ ପାଇବେ।ଗତ ରବିବାର ଏହି ମନ୍ଦିର ପ୍ରତିଷ୍ଠା ଉତ୍ସବ ଅବସରରେ କୋରାପୁଟ ଜିଲ୍ଲାର ବିଭିନ୍ନ ଅଞ୍ଚଳରୁ ଜଗନ୍ନାଥ ପ୍ରେମୀ ଭକ୍ତ ଗୁପ୍ତେଶ୍ଵର ପହଞ୍ଚିଥିଲେ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
