କୋରାପୁଟ: କୋରାପୁଟର ଜଣେ ଯୁବକ ଜଣେ ନାବାଳିକାଙ୍କୁ ପେଟ୍ରୋଲ ଢାଳି ନିଆଁ ଲଗାଇ ହତ୍ୟା ଉଦ୍ୟମ କରିଛି । ଏଥିରେ ପୀଡିତାର 50 ପ୍ରତିଶତ ଶରୀର ପୋଡି ଯାଇଛି । ତେବେ ପରେ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି ।
ସୂଚନା ଅନୁସାରେ, କୋରାପୁଟ ସେମିଳିଗୁଡାର ଏକ ଘରୋଇ ମହାବିଦ୍ୟାଳୟରେ ଜଣେ ନାବାଳକ ଭିଆଇଛି ଏହି କାଣ୍ଡ । ସହପାଠୀଙ୍କୁ ପ୍ରେମ ନିବେଦନ କରି ଜନୈକ ନାବାଳକ ଜଣକ ବିଫଳ ହେବା ପରେ ତାର ରୁମରେ ପଶି ପେଟ୍ରୋଲ ଢାଳି ନିଆଁ ଲଗାଇଥିବା ଅଭିଯୋଗ ହୋଇଛି ।
ଅର୍ଦ୍ଧଦଗ୍ଧ ଅବସ୍ଥାରେ ନାବାଳିକାଙ୍କୁ ସାଥିମାନେ ଉଦ୍ଧାର କରି ସେମିଳିଗୁଡା ହସ୍ପିଟାଲରେ ଭର୍ତ୍ତି କରିଥିଲେ । ପରେ କୋରାପୁଟସ୍ଥିତ ମେଡିକାଲ କଲେଜ ହସ୍ପିଟାଲକୁ ତାଙ୍କୁ ସ୍ଥାନାନ୍ତର କରାଯାଇଥିଲା । ତେବେ ଅବସ୍ଥା ସଙ୍କଟାପନ୍ନ ହେବାରୁ ସଖି ଅନୁଷ୍ଠାନ ସହାୟତାରେ ବ୍ରହ୍ମପୁର ଏମକେସିଜି ମେଡିକାଲକୁ ପାଠାଇ ଦିଆଯାଇଥିଲା । ତେବେ ଏହି କାଣ୍ଡ ଭିଆଇଥିବା ନାବାଳକ ବର୍ତ୍ତମାନ ଫେରାର ରହିଛି । ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
